Shillong, Iaong 06: Ka Hynniewtrep Borders Dispute Rederssal Furom (HBDRF) kaba dei kawei ka kynhun ka ba peit ia ki jaka ki ba don hapdeng ka jingia kajia khappud khamtam ha block-1 bad block-2 ha ka jingialam u Chandame Sungoh kum u chairman ka la leit ban ia kynduh ia u CEO ka jylla Meghalaya u ba dei peit ia ka tnad election. Ka long halor ba ki ba bun ki nongshong shnong jong kitei ki jaka ki kwah noh ban ioh epik hapoh ka jylla Meghalaya.
U la ong ba Ka jingeh ka long ba ha kane ka election ba dang shu dep ki ba bun ki pait nongshong shnong ha kitei ki thaiñ kim da biang bha ka jingsngewthuh ha ka ba iadei bad kam election. La ong ba ki ba bun hi ki pynrung kyrteng sha ki shnong ba don lypa hapoh ka electoral roll jong ka jylla Meghalaya.
Kum ki nongshong ki ba sah ha Muriap, Mynriah, Madanmyni bad kiwei kiwei ki shnong ki pynrung kyrteng sha ki shnong ki ba la don hapoh electoral roll ka jylla Meghalaya.
Kum sha poh Saitsohma, Khanduli, Mukroh, Sahsniang, Mokaiaw bad kiwei kiwei.. Ka jingleit iakynduh jongki ha u CEO. Ka long ba ka seng ka kwah ia kitei ki shnong ba kin wan noh sha ka jylla Meghalaya.
Katkum ka jingpynshai ba la ioh na u CEO. Hapoh ka kyndon ka election commission ‘ym don aiñ ban pynrung kyrteng ia ki shnong. Hynrei ban pynrung kyrteng tang ia u briew’.
U la ong ba ka kamram jong ka seng ka long ba kin leit ban pynshai ia kane sha kitei ki shnong ki ba kynthup kumba 36 tylli. Ba kin pynbiang noh ki kot ki sla baroh ha ki shnong ki thaw jong ki, bad kin apply ne enroll noh ha la ki jong ki jong ki shnong jong ki.
Lada don kano kano ka jingshah reject ha ka election commission ka jylla Meghalaya, ka seng kan sa iapynbeit kaei ba donkam ban leh ha ryngkat bad ka election commission.
U la ong ruh ba ha kane ka 15tarik u iaiong kin sa leit Sha ka shnong Muriap na ka bynta ki jingdonkam bad kin rah ruh ia ka jingpynshai ba ki la ioh na u CEO ba kin ioh ban leh ia ki jingdonkam jong ki baroh.
U la pynshai shuh, Kumba 30% ki don ki ba don vote ha ka jylla Assam hynrei ka kyrteng jong ki, ki jait jongki ka rukom thoh kam iadei ha ka spelling, ki shnong kumta ter ter namar la warshim kyrteng na ki briew ki bym iadei na ka juh ka jaitbyndriew bad ruh kine ki briew mynta ki la pynpaw ba kim kwah shuh ban dang iai don bynta bad ka jylla Assam.
Ki pynpaw ba ki kwah ban iadon bynta noh bad ka jylla Meghalaya bad ruh mynha kane ka election MOC kine ki briew ki la boycott noh ia ka election.
