Shillong, Jylliew 03: Mynta ka sngi ka seng Jaintia Students Union hapoh ka jingialam jong u President u samla Jersom Shylla bad ki dkhot kila leit ban ia kynduh ia ka DGP, ka kong Idashisha Nongrang ha kaba ki la ai ia ka dorkhas ha kaba ia dei bad kiba bun ki mat kiba dei na ka bynta ka jaintia Hills.
Kawei na ki mat kiba kongsan kiba ka JSU kala buh ha kane ka dorkhas ka long ba ka tand pulit ka dei ban buh ia ka jaka thoh eksam ha kaba ia dei bad ka kam pulit namar bun na kiba apply ki hap ban wan thoh sha Shillong kane kala buh ha ka jingeh ia ki samla kiba dun ka ioh ka kot.
Ka seng kala buh ruh ia ka jingdawa ba ka tnad pulit ka dei ban buh noh ia u number phone ban iarap ia ki riew kynthei bad ia ki khynnah kiba lah ban treikam baroh 24 kynta, kane ka long ban iarap ia ki riew kynthei kiba shah thombor ba kin pyntip mardor.
Ha ka dorkhas la kdew ruh ba ka tnad pulti ka dei ban dang pynbha shuh shuh ia ki jaka sah jong ki pulit kum ha Khanduli bad Mukroh, kine ki jaka sah jong ki pulit la shu sop da a tin, haba phai sha ka jingiakhun pyrshah ia u drok ka seng ka dawa ba dei ban dang pynkhlain shuh ia ka tnad pulit.
Ka seng kala kdew ruh ba ki don ki khyrdop khrong khajna pisa beain bad kine kila wan rah ia ka jingkiew dor jong ki mar ki matta bad kane ka ktah ia u thap u dap, ka tnad pulit ka dei ban phah tohkit ia kane bad ban pynshitom ia kiba don kti.
Ha kane ka jingiakynduh la kyntu ban pynkhlain ia ki Border Police Outpost kiba don ha khappud bad ka jylla Assam, ban lait na ka jingshah thombor ki briew kiba don ha khappud bad ka jingshah pyniap ruh.
La kdew ruh ba ka sorkar kala dep ban shim ia ka rai ban buh thymmai hynniew tylli ki BPO, ha ki jaka kiba juh don jingia ka jia, kum ha Mukroh bad Tihwieh ha West Jaintia Hills, Mooriap ha East Jaintia Hills, Rani Jirang ha Ri Bhoi District, Umwali Lejadubi bad Langpih ha West Khasi Hills.
