Shillong, Iaiong 02: Ki nongialam ka Jaintia Student Union (JSU) hynne ka sngi ka la leit buh da jingthoh ha u Symbud Myntri Rangbah u bah Sniawbhalang Dhar ban kyrpad ban buh ia ka jaka thoh eksamin MPSC ha ri lum Jaintia.
Ha ka shithi ba la aiti ha u symbud myntri ka sorkar jylla ka Jaintia Students’ Union ka la pynpaw ia ka jingkynduh jingeh ki samla pule ka thaiñ namar ka jingbym don ka jaka ban thoh eksamin MPSC ha Rilum Jaintia la kdew ruh ia ka jingshem jingeh ki samla kum ka jingjngai ha ka leit ka wan, ka jingdheng kali bad ka jinglut ba bun namar ba jngai ka jaka ban ialeh exam.
Ka Jaintia Students Union lyngba u General Secretary Neilkee Mukhim ka la pynpaw ba ka long ka jingduhnong ia ki samla pule na ka thaiñ Jaintia namar wat la ka don ka jingbun ki samla pule ki ba apply ha ka MPSC, hynrei ka jingbym don ki examination center sha kane ka thaiñ.
La pynpaw ruh ba ka seng ka la ju rah ia kane ka mat la bunsien ha u Myntri ka tnad pule puthi ka sorkar jylla hynrei haduh mynta, kam shem don kano kano ka jingshim khia halor kane ka mat.
“Wat la ka don ka MPSC Cell Office ha Jowai hynrei kane kam shem la wanrah jingmyntoi ia ki samla pule ka thaiñ namar ka jing bym don jaka thoh exam ha ka ba ki samla pule ki dang hap ban wan shaduh Shillong na ka bynta ki jingdonkam”
Ka Jaintia Student Union ka buh ka mat jingdawa jong ka da kaba ka la buh ka jingkyntu ia ka sorkar bad ia ka Meghalaya Public Service Commission ba kin buh ia ka jaka thoh eksamin MPSC ha Jaintia hills khlem da pynslem shuh.
Kane kan pynduna ia ki jingeh kiba ki samla pule ki ia kynduh khamtam kito kiba wan na ka longing longsem ki ba duna ka ioh ka kot ha ka liang ka pisa tyngka bad kan pynthikna ba ki samla kin ioh lad ban ialeh eksamin kaba iaryngkat bad kiwei.
Ka Jaintia Student Union ka la pynpaw ka jingsngewkhia ba “Naduh ba la ioh ia ka jylla Meghalaya ha u snem 1972, ki paidbah ka Jaintia Hills ki la iakynduh shibun ki jingeh ban ioh jingnang jingstad bad ka iohkam iohjam.
Ka jingbuh ia ka jaka leh eksamin ha katei ka thain kan iarap ban pyndap ia kine ki jingduna bad ban pynthikna ba ki samla pule na Jaiñtia Hills kin ïoh ïa ka lad kaba mar katjuh, Ngi kyntu ia ka sorkar bad ka MPSC ban shim khia mardor ia kane ka kam na ka bynta ka bha ka miat bad ka roi ka par jong u paitbah”
