Shillong, Risaw 26: U Bah Charles Marngar MLA jong ka Mawhati mynta ka sngi u ia kynduh ia ki rangbah shnong kiba hap hapoh jong ka Block-II jong ka Ri Bhoi District namar bun ki shnong hapoh ka Raid Nongtung kim don ia ki skul, ia kane ka jingialang la pynlong ha shnong Jatalong.
Ha kane ka jinglang la wan ban ia shim bynta ym tang ki rangbah shnong hynrei la wan ban ia shim bynta da ki long kmie ki samla bad ki nongialam shnong, ha kane ka jingialang la don lang u DSEO, DCPO ICDS na ka tnd ka koit ka khiah jong ka Ri Bhoi District.
Ha kane ka jingialang la shem ba ki don hynriew tylli ki shnong ki bymdon skul, kiwei ki shnong kiba la don skul kiba dei na ki riew shimet kiba dei ki LP Skul bad ki skul SSA hynrei kine ki skul kim don ia ki iing skul kiba biang.
Ha kaba ia dei bad ka koit khiah ki don phra tylli ki shnong ki byn don ASHA, la don ruh ki shnong kiba la pynpaw ia ka jingeh namar ki hap hapoh ka Dispensary ha Tyrso namar ka leit kawan kam ia hap shuh namar ba ki hap ban iaid lyngba ka Mawlasnai, kila pynpaw ba la dei ban pynhap noh ia ki shnong sha Mawlasnai PHC.
Ha kane ka jingialang ki nongialam shnong kila pynpaw ba ha kane ka PHC ki dawai kim biang, ha kane ka Mawlasnai PHC don tangwei doktor bad kila pynpw ba ki kwah ban don sa wei doktor.
Haba ia dei bad ki Anganwadi Center, ki nongialam shnong ki la iathuh ba haduh mynta ki dang don khyndai tylli ki shnong ki byndon ia ki Aganwadi Centre, halor kitei ki jingeh la ioh ia ka jingpynshai na ki ophisar kiba la don lang ha kane ka sngi.
Ha ka jingkren na ka liang jong u MLA u la pynpaw ia ka jingsngew diaw ba dang don ki shnong kiba khlem pat don skul, bym don ASHA bad ki Aganwadi Centre, na ka liang jong u la ong ba un sa shim khia ba baroh ki shnong ki dei ban don ia ki iing skul.
Ha kane ka sngi u la ong ba ha kane ka thain la dei ban don ia ka Secondary school ha Kane ka thaiñ, khnang ba ki khynnnah kin ioh ban bteng ia ki jingpule ki jong ki, namar ba ka buh jingeh ia ki kmie ki kpa ki ba duk ban phah school Shahar shnong.
Ha ka ba ia dei bad ki ASHA, ka jingbymbiang dawai bad kiwei kiwei ki jingeh ka Health Department ruh u la kular ban shim khia ban kren Sha ki bor ba dei peit bad kum juh ha kaba ia dei bad ki Aganwadi Centre.
