Mairang, Iaiong 27: Kum shibynta jong ka jingrakhe ia ka jingdap 50 snem jong ka jylla Meghalaya, la ioh ban pynkupburom ia ar ngut ki nongialam jong ka jingiakhih Hill State ka jylla, kata, u Bah Hopingstone Lyngdoh, bam kwai ha dwar u Blei bad u Bah Fuller Lyngdoh Mawnai , bam kwai ha dwar u Blei.
Ha kane ka sngi la pyndon burom ruh ia ki 16 ngut ki volunteer jong ka jingiakhih Hill State da ki bor pyniaid distrik jong ka Eastern West Khasi Hills District ha ka prokram ba la pynlong ha Madan Mot Tirot, Mairang Mission, Mairang mynta ka sngi ha kaba u Lamphang ka Iing dorbar Thaw Ain ka jylla, u Bah Metbah Lyngdoh u la long u kongsan ha ka jingdon ryngkat u myntri ka tnat Water Resources ka jylla, u Bah Brolding Nongsiej uba la wan kum u symbud kongsan.
Kiwei pat kiba la wan sha kane ka prokram ki kynthup ia u MDC ka Mairang- Nongkhlaw, U Bah Batskhem Ryntahiang, u Deputy Commissioner ka Eastern West Khasi Hills Distrik, u Bah W. Nongsiej, u Superintendent of Police ka Distrik, u bah M.B Syiem.
U Syiem ka Hima Nongkhlaw, u Pa’iem P.M Syiemlieh, u Syiem ka Hima Myriaw, u Pa’iem K. Syiem, u Syiem ka Hima Mawiang, u Pai’em N. Syiem, ki nongialam shnong ka thain, ki nongrep, ki dkhot jong ki seng treilang (SHG), ki nonghikai bad ki khynnah pule.
Ha ka jingkren jong u kum u kongsan, u lamphang ka Iing Dorbar Thaw Ain ka jylla, u Bah Metbah Lyngdoh u la kren shaphang ka jingiohi jngai jong ki nongialam jong ka jingiakhih Hill State ka jylla kiba la trei dohiap ban pynthikna ba ngi ioh la kajong ka jylla kaba iahap bad ki dustur bad rukom jongngi ki riewlum.
Shuhshuh, u Bah Metbah u la ong ba kane ka jingrakhe ka pynioh ha ki nongshongshnong ia ka kabu ban phaidien sha ka mynnor jong ka jylla, ka jingiaid lynti jongka ha ka roi ka par ha kiba bun ki liang lyngba ki snem bad phew snem bad ka long ruh ka kabu ban pyrkhat kumno ban kyntiew shuhshuh ia ka jylla ha ki 50 snem ban dang wan. U Bah Metbah u la khot la wer ruh ha kane ka sngi ia ka jingiatreilang shitylli da baroh lang na ka bynta ka roi ka kiew jong ka jylla Meghalaya.
Haba kren halor ka Ginger Mission jong ka jylla ia kaba la ioh ban plie dang shen da u Myntri Rangbah ka jylla, u Conrad K Sangma, u Bah Metbah u la ong ba kane ka Mission kan plielad plie lynti ban kyntiew ia ka ioh ka kot ki nongrep jong ka distrik bad ka jylla hi baroh kawei namar lyngba jong ka yn lah ban kyntiew ia ka bor pynmih sying jong ka jylla, ban shalan ia u bad ban shna jingshna de.
Ha kane ka sngi la ioh jingpynshai halor ka Ginger Mission na ka tnat Agriculture bad ruh halor ka Public Distribution System na ka tnat Food & Civil Supplies ka jylla. La ioh ruh ban sam ia ki symbai sying hapoh ka skhim Ginger Mission- Spices Development Scheme 2022-2023 sha ki nongrep ka thain.
Kiwei kiwei pat ki prokram ha kane ka sngi ki kynthup ia ki dukan ba la buh da ki tnat sorkar bapher bapher bad da ki Seng treilang (SHG) bad la sakhi ruh ia ki jingrwai bad jingshad tynrai na ki samla don sap ka thain. La ioh ruh ban sam khusnam da ki kynrem ki lyndan sha ki nongjop jong ka jingiakob mareh marathon, Quiz, thoh ese bad painting ia kiba la pynlong kum shibynta jong kane ka jingrakhe.
