Shillong, Lber 24: U wei u rangbah briew uba shong basah ha Laban, Kench’s Trace, Shillong u la dkhat jubor ia la ka jong ka jingim da kaba noh iap na jingkieng Damsite ha ka 23 tarik mynta u bnai Lber.
Haba kren bad u Superintendent of Police ka East Khasi Hills District u Bah Vivek Syiem u la iathuh ba ha ka por ba une u briew u kynthih na jrong jingkieng Damsite ki don ki briew kiba sakhi ia kane ka jingjia bad kiba la pyrshang ruh ban iarap da kaba kawang da u tyllai ban iarap hynrei une u briew um treh satia ban bat ia u tyllai.
U Bah Syiem u la iathuh ba ia une u briew la tip kyrteng kum u Pritesh Deb, kurim ka kong Silanda Mylliemngap ba na Madan Laban Shillong. Une u rangbah u dei uba don dukan die tiar electronic ha Last Stop, Laban.
Shuh shuh u Bah Syiem u la iathuh ba da ka jingtrei shitom ka kynhun SDRF, ka Search and Rescue Team (SRT) bad ki Pulit ka Fire & Emergency Services mynta ka 24 tarik u Lber ban ioh ban sei noh ia ka met iap une u rangbah haka 2 baje noh phai sngi.
Haba kylli u Bah Vivek Syiem u la iathuh ba kane ka jingdkhat jubor jong une u rangbah ia la ka jong ka jingim kadei ki daw kam iing kam sem bad mynta ki pulit ki dang pynlong shuh shuh ia ka jingtohkit halor kane bad ki pulit mynta ki lah pyndep baroh ki jingdonkam.
