Shillong, Nailur 17: U Bah Wellborn Bynnud, nongshong shnong ka Hima Sohra u la sei da ka video kaba pyni ba ki don katto katne ki kali rit private kiba pakhang lynti ia ki trok ban thew ban woh ha ki Weight Bridge shwa ban rung buh mawshun sha ka ri Bangladesh lyngba ka Majai Land Custom Station.
Haba kren sha ki lad pathai khubor, ha ka 17 tarik u Nailur, 2024 ha Shillong press club u Bah Wellborn u la ong ba kitei ki trok ki dei kiba ïaid kit palat ia ka 12 ton bad ki pynkhein ia ka hukum jong ki bor pynïaid District ka East Khasi Hills ba ki trok kim bit ban kit palat ia katei ka jingthew.
U Bah Wellborn u la maham ban shim da ki sienjam kiba tyngeh pyrshah ia ki nongkhaïi bar ri lane ki exporter kiba kynnoh khlem jingpynshisha ia u ba u dei uwei na ki exporter.
U la ong ba ka jingkynnoh jong ki ka long ruh hapdeng ka jingap jubab na ka ophis Commissioner of Transport na kaba u la dawa ba dei ban teh lakam ia ka jingkit palat pud ki trok kiba la wanrah ka jingjulor ia ki surok ha katei ka thaiñ khamtam ka surok ba peit da ka Hima Sohra kaba long 1.8 KM shwa ban rung sha Bangladesh.
Da kaba pynpaw ba ka don ka jingiasylla naduh ki bor pulit, ki bor bahalor ka tnad Transport, PWD bad ki nongkhaïi, u Bah Wellborn u la ong ba la donkam ban phah tohkit CBI ha katei ka bynta kad khaïi.
