Shillong, Nailur 03: U Nongialam ka liang pyrshah u Dr Mukul Sangma mynta ka sngi u la kynnoh ba kala don ka jingbam sap ha kaba pyntrei kam ia ka skhim “Saubhagya” kaba dei ban pynioh bor ding ieletrik sha ki 1400 tylli ki shnong ha ka jylla Meghalaya baroh kawei.
Ban pynksan ia katei ka jingkynnoh jong u pyrshah ia kane ka sorkar MDA kaba la ialam da u Conrad K Sangma jong ka Party NPP, u la ong ba ka dor ba la ai kontrak ka long haduh 50% ka jingkiew dor na ka dor bala buh. Ha dien kane kala don ka jingmudui da u wei na ki kontraktor sha High Court jong ka jylla Meghalaya bad ha dien kata u nongmudui u la weng noh.
Ha dien jong katta la weng ruh ia u CMD jong ka MeECL bad kala don ka shithi na ka ophis jong u CMD sha ki SDO ban pynkhreh ia ki Bill bad phah sha u Chief Engineer ban siew ia ka bill sha ki kontrator, na ka liang jong u Dr Mukul u la kylli kaei kane ka jingleh ha kaba hap ban iaid lait ia ki rukom trei kam jong ka MeECL bad lada dei ban leh kumne mynno ka Board kala shong jingialang ban shim ia ka rai.
La iathuh ba ia kane ka skhim “Saubhagya” la phiah ha ki ar bynta, ka bynta kaba nyngkong ka dei sha Khasi Hills bad ha kaba la khot tender ha ka dor T.173.60 klur bad ha dien bala peit biang ia ka dor la pynkiew sha ka T.255.58 klur bad na ka bynta ka Garo Hills ka tneder kaba la khot ka long T.179.00 klur bad ha dien ba la peit biang la pynkiew sha ka T.270.37 klur.
U Dr Mukul u la ong ban ia da kane ka jingshah lute jong ka jylla ha ki briew kiba ha ka bor, u la ong ba na ka liang ka party Congress kan shim ia baroh ki lad ki lynti bad ban pynthikna ba kiba ia don bynta ki shah pynthistom katkum ki kyndon ain.
