Shillong, Nailar 17: U bah Bashailang Khongwir ba dei u dkhot jong ka National Council Member jong ka party BJP u la kyntu ia ka sorkar ba ka dei ban pynkloi ban khot ia ka seng lehnoh HNLC sha ka miet jingiakren ia suk ha kaba tei ka kynhun kala pynpaw ia ka jingkloi jong ka ban poi sha ka jingiakren ia suk.
U tei u nongialam jong ka party BJP u pynrem jur ia ka jingleh kaba la dkhat ia ka jingim jong u nongialam barim ka HNLC u bah Chersiterfield Khongwir u ba la wan phai sha ka imlang sahlang ha u snem 2018 bad kane ka jingjia ka long kaei kaei kaba ym lah ban pdiang.
U bah Khongwir u la ong ba ai ka jingtohkit da ka kynhun kaba lait luid bad ai kito kiba don kti kin ngat ha ka jingbishar katkum ka ain namar ha ka synshar paidbah kum kine ki jingjia ki long kiei kiei kiba ym lah ban pdiang ha ka imlang sah lang.
Ha ka juh ka por u bah Khongwir u khot u wer ia ki khun samla ba kin ait ia ka shongsuk shongsain ha ka jylla bad khamtam ha kane ka nongbah Shillong namar ka jinghuri hura kan ktah ia ka imlang sah lang khamt ia ka ioh ka kot nalor ba la shah ktah ha kane ka khlam COVID-19.
Ka party BJP ha kane ka jylla Meghalaya ka ia trei lang ha kane ka sorkar MDA kaba la lam khmat da ka party NPP ha kaba ka party BJP ka don ar ngut ki MLA bad u wei u don ha ka kynhun myntri jong ka sorkar.
