Shillong, Jymmang 21: U Myntri Sorkar Pdeng ba dei khmih ia ki tnat Pule Puthi, Skill Development bad Entrepreneurship, u Dharmendra Pradhanmynta ka sngi u la wan ban iashim bynta kum u kongsan jong ka XXVII Convocation jong ka North Eastern Hill University (NEHU), Meghalaya bad u la ai ia ki degree sha ki samla pule kiba la pyndep ia la ki jingpule na ka bynta ki snem 2020 bad 2021 ha ka jingialang ba la pynlong ha NEHU.
U Pradhan u la ai jingkhublei ia ki samla pule kiba la pyndep ia la ki jingpule bad u la kitbok kitrwiang ia ki. U la kyntu ruh ia ki ba kin wanrah ia ka jingkylla ha ka imlang sahlang da kaba iashim bynta ha ka jingpynkylla ba buh nongrim ha ka jingstad bad ba kin long ki nongaikam ia kiwei.
Ki skul ki dei ki jaka pdeng jong ki jingmut jingpyrkhat, ki jingsaindur bad ki jingangnud bad ki skul bah ki dei ban long ki jaka kiba kyntiew ia ka jingwadbniah – ka jingwadbniah na ka bynta ka bha ka miat jong ka imlang sahlang bad ki briew bad ruh ban wanrah shuh shuh ia ka jingsuk ha ka rukom im, u la bynrap.
U Myntri u la kren shaphang ka NEP 2020 bad u la ong ba kane ka dei ka lad sha ka jingkyllaia ngi baroh. Ka National Education Policy ka peit bniah ia ka jingpynioh ia ka jingsumar bad ka pule puthi ha ki snem ba dang lung bad ka ban jur ruh ha ka jingai jinghikai ha baroh ki ktien tynrai ka India.
U la ai khublei ia u Myntri Rangbah Duh, u Narendra Modi uba la ban biang ia ka jinglong kongsan jong baroh ki ktien jong ka India. Ym don kano kano kaba kham duna lane kaba kham tam, u la ong.
U Pradhan u la iaroh ruh ia u Myntri Rangbah, u Conrad Sangmauba la peit bniah ba ki khynnah kiba dang lung kin ioh ia jingsumar bad ka pule puthi ha Meghalaya kaba iahap bad ka NEP 2020. Kane kan pynthikna ba ki khynnah jong ngi ki kot sha ki kliar kiba ki dei ban poi.
U Pradhanu la ong ba haba ngi rakhe ia ka AmritMahotsav, ki samla jong ngi ruh ki dei ban phaikhmat noh na ki hok sha ki kamram. Haba ngi iaid ha ka lynti jong ki kamram ba ngi dei ban pyndep, ngi dei ban kyntiew ia ka ri jong ngi sha ki kliar kiba thymmai ha kine ki 10 snem ban wan.
U la pynshlur ia ki samla ba kin pynthikna ba kan don ka jingiadei kaba jan hapdeng kito kiba la pyndep ia ka jingpule na kane ka skul bah. To ngin ia siew kylliang ia ki skul ne ki skul bah jong ngi da ki tiar lane ki jingstad bad shim ruh ka jingbahkhlieh ia ka jylla, ka ri bad ki briew. Kane ka dei ka por kaba biang bha ban siew kylliang, u la ong.
U Myntri Rangbah ka Meghalaya, u Conrad Sangmauba la wan iashim bynta ha kane ka Convocation ha ryngkat u Myntri Sorkar Pdeng u la kyntu ia ki samla pule ba kin peit ia ki lad ba thymmai bad ba kin long kiba shlur ban shim ia kine ki lad da ka jingsngewthuh khnang ba kin poi sha ki kyrdan ba kham halor. Wat ym duh jingkyrmen haba phi shah rem hynreiwatju shah ia ka jingjop ba kan kiewskong ha phi, la ong u Myntri Rangbah Duh ia ki samla pule.
La ai haduh 15,955 tylli ki degree mynta ka sngi ha kane ka Convocation bad na kine, 117 ki dei ki PhD, 8 ki dei kiM.Phil, 1559 ki dei ki degree PG bad 14,271 ki dei ki degree Bachelor’s. U Myntri ka Sorkar Meghalaya ba dei khmih ia ka tnat Pule Puthi, uLahkmenRymbui, Vice-Chancellor NEHU Professor P. S. Shukla ki nonghikai bad ki samla pule ka NEHU ki la iashim bynta ha kane ka convocation mynta ka sngi.
Hadien kane, u Myntri Sorkar Pdeng ha ryngkat u Myntri Rangbah ka Meghalaya u Conrad Sangma bad u Myntri Sorkar Meghalaya ba dei khmih ia ka tnat Pule Puthi ki la pynlong ia ka jingialang ban peit ia ki kam kiba iadei bad ka pule puthi, ka Skill Development bad ka jingseng kam lajong ha kaba la iashim bynta lang ki ophisar ka Sorkar Pdeng bad ka Sorkar Meghalaya.
U Myntri u la kmen ban iohsngew ba ka Meghalaya ka la pyntreikam ia ka NEP ha ki kam bapher bapher. Ki sienjam ka Sorkar Meghalaya kum ka Aspire Meghalaya bad ka Prime Meghalaya ki la pynskhem ia ka jingwad ia kito kiba don sap, ban ithuh ia kine, ban kyrshan ia ka jingseng kam lajong bad ka jingplie ia ki lad kiba don ha Meghalaya.
U la ong ba ka jylla kaba iaidshaphrang kum ka Meghalaya ka dei ruh ban ialam lynti ban seng ia ki jingdon jingem na ka bynta ki kam digital jong ka ri, khamtam ka rynsan pynrung kyrteng ia ki samla pule kum shi bynta ka NDEAR bad ruh ban wanrah ia ki jaka pule jong ka jylla hapoh ki rukom treikam ka NIRF & NAAC.
U la ong ruh ba ka NEHU ka dei ban iatrei lang bad ki jaka pule bad ki kynhun ha kylleng ka jylla ban iasam ia ki jingstad bad ki jingshemkhamtam ha ka jingai jinghikai ban kyntiew ia ki sap ha ki jaka nongkyndong. Ka tnat Pule Puthi jong ka Sorkar India kan ai jingkyrshan ban pynlong ia ka Meghalaya kum ka jylla kaba pawnam ha ki kam kiba iadei bad ka pule puthi bad ka jingseng kam lajong.
Hadien kane, u Pradhan u la leitjngoh ia ka Umsning Presbyterian school. U la ong ba ki Neuro-surgeon,pilot,engineer, nongialehkai football, nongtemnongput – ki jingangnud bad ki jingkyrmen jong ki nongialam jong ka ri ki ban wan na kane ka skul ha Ri Bhoi distrik jong ka Meghalaya kin pynskhem ia ka jingngeit skhem ba ka India kan sa long ka ri kaba iar ha ki jingnang jingstad.
