Ampati, Kyllalyngkot 27: Katkum ka kam jong ka tnat Development of the North Eastern Region (DoNER), u Dr.Bhagwat Kishanrao Karad, Myntri Khynnah ka tnat ka Ioh ka Kot u la leit jngoh mynta ka sngi ia ka Ampati, ka nongbah jong ka South West Garo Hills distrik ha Meghalaya ban peit ia ka jingpyntreikam ia ki skhim bapher bapher jong ka Sorkar pdeng.
Ia u Dr.Karadla synran da ka MP jong ka 2-Tura konstituensi, ka Agatha K Sangma, Rangsakona MLA, Subir M. Marak, Deputy Commissioner, R.P. Marak, Superintendent of Police, Vikash Kumar ha ki jingiakakren ba la pynlong ha lai tylli ki jaka ha kane ka jingwan kaba nyngkong jong u Myntri sha Ampati.
Ha Ampati Circuit House conference hall, la ai jingtip ia u Myntri shaphang ka jingjop, ki jingseisoh bad ki jingeh ha ka jingpyntreikam ia ki skhim Sorkar Pdeng lyngba ka power point presentation da ka ADC Dr.Rezina Ch Marak ha kaba la iashim bynta ruh da ki ophisar na ki tnat bapher bapher.
Ha ka jingpeit ia ki skhim ba ialam da u Myntri Rangbah Duh, Narendra Modi bad ki sienjam jong ka Sorkar Jylla, u la ong ba u la hun ia ka jingpyntreikam ia ki skhim bapher bapher ha ka distrik bad u la ban jur halor ka jingiatreilang ban wanrah ia ka roi ka par ha ka thain shateilam mihngi.
U Dr.Karadu la kren shaphang ki lad ban kyntiew ia ka jingplie lad ia baroh ha ki kam pisa, khamtam ha ki jaka rilum da kaba plie shuh shuh ki branch jong ki bank.
U la ong ba ki jingiakren bad u Myntri Rangbah, Conrad Sangma ki la pyni ba ki don ki briew kiba trei na ka bynta ki bank bad ba kin sa don ki sienjam ban plie shuh shuh ki branch jong ki bank ban ai jingshakri ha ka thain.
U Myntri u la ban jur halor ka jingdonkam ban kyntiew ia ki jingshakri ha ki kam ka koit ka khiah da kaba plie lad shuh shuh ia ka jingioh ia ki dawai ba shna hapoh ka ri bad ka jingkyntiew ia ka jingsumar shuwa ban khakhun ha ryngkat ka jingkhakhun ha ki jaka sumar.
U la pynshlur ia ka jingkyntiew kyrteng jong ki longkmie ba dang pun khun hapoh ka Pradhan Mantri Matru Vandana Yojana kaba ai jingmyntoi haba ki leit kha khunlung ha ki jaka ai jingsumar.
U Dr.Karadu la ban jur halor ka jingdonkam ban pynsaphriang ia ki skhim ba ai jingkyrshan da ka Sorkar kum ka Pradhan Mantri Suraksha Bima Yojana kaba ai ka insurance ha ka dor kaba jem.
U la iaroh ia ka jingiaid shaphrang jong ka Jal Jeevan Mission ha ka distrik bad u la kyntu ban ai jingtip shuh shuh bad ka jingpyntreikam kham bha ia ka Pradhan Mantri Gramin Aawas Yojana.
U Myntri u la iaroh ia ki sienjam kiba iadei bad ka pule puthi lyngba ki skul Eklavya Model Residential bad u la ong ba un sa peit ia ki lad ki lynti ban plie shuh shuh kine ki skul ban pynbiang ia ka pule puthi kaba bha ia ki riewlum ha ki jaka ba jynjar ban poi.
Kum shi bynta jong ka Viksit Bharat SankalpYatra campaign, u Myntri u la iakren bad ki briew kiba ioh jingmyntoi ban ai jingtip bad pynthikna ka jingpyntreikam pura ia ki skhim Sorkar ha kylleng ka ri.
Kane ka campaign ka thmu ban pynpoi ia ki kam sha kito ki bym pat ioh ia kine khamtam sha kito kiba dei ban ioh ia ki skhim bapher bapherhynrei ki bym pat ioh ia ki.
U Myntri u la ia kynduh mar khmat bad katto katne ngut ki nongioh jingmyntoi bad u la twad jingmut na ki shaphang ki jingmyntoi ba ki ioh na ki skhim bad ruh ki jingeh ba ki iakynduh ban ioh ia kine ki jingmyntoi.
Ha ka jingpynkutia kane ka jingwanjngoh jong u, u Dr.Bhagwat Kishanrao Karad u la kren shaphang ka kamram jong baroh ban pynurlong ia ka Viksit Bharat shuwa u 2047, kumba la thmu da u Myntri Rangbah Duh, Narendra Modi.
U la ban jur ha ka jingpynioh bynta ia baroh ha ki kam pisa, ka jingai jingtip bad ka jingbteng ki jingpyrshang ban wanrah ia ka roi ka par kaba pura ha ka thain shatei lammihngi.
Ha kane ka jingiakren, ka MP Agatha Sangma bad MLA, Subir Marak ki la ai jingsngewnguh ia Dr.Karaduba la pyllait por ban wan jngoh ia ka thain bad ban sngap ia ki jingeh jong ki briew bad ki katto katne ki jingeh ha ka jingpyntreikam ia ki skhim bad ki la kular ruh ba kin leh ia kaba donkam ban pynbeit ia kine ki jingeh bad iatrei lang bad ka Sorkar Pdeng bad ka Sorkar Jylla.
Hadien kane, u Myntri u la leitjngoh ia ka Ampati Civil Hospital bad u la iakren bad ki nongai jingsumar shaphang ki jingdonkam ban kyntiew ia ki lad ai jingsumar ha kane ka hospital.
Ha kane ka sngi, u Dr.Karadu la iakren ruh bad ki doktor bad ki nongtrei ha kane ka jaka bad u la ai jingsngewnguh ia ki na ka bynta ka jingtrei shitom jong ki. U la ban jur halor ka jingdonkam ban pyndap ia ki post ba thylli ha kane ka hospital ban pynthikna ka jingai jingsumar kaba bha.
U la pdiang ia ka jingdonkam ha ki kam puid nongpang ha ka thain bad u la pynshlur ia ki nongai jingsumar ba kin sdang mardor ia ki kam puid haba donkam ia ki. U la kren shuh shaphang ki jingmyntoi kiba wan sha ki briew haba don ki kam ai jingsumar kiba khlain ha ka thain.
