Shillong, Rymphang 12: Mynta ka sngi ka ophis jong ka Reserved Bank jong ka Ri India kaba don ha Shillong kala pynlong ia ka jingialang paidbah ha Mawkdok ban pynshai sha ki paidbah ha kaba ia dei bad ka jingtrei kam jong ki bank, kum shi bynta na ka jingrakhe ia ka Taiew jinghikai ha ka kynshew kyndiap.
Ha kane ka jingialang pynshai paidbah kaba la long ha Mawkdok u P. Gangte, General Manager jong ka RBI ba don ha Shillong, u la kyntu ia ki paidbah ba kin shim ia ki ram kiba bun jaid kaba ki bank ki don ban ai sha ki paidbah, u la ong wat shim ram na ki riew shimet namar ki ai ia ka sut kaba heh.
Ha ka juh ka por u Gangte u la pynshai ba haba ki shim ia ka ram na ki bank ki dei ban siew thikna sha ka bank kaba ki shim ram kumba la ia kut bad kane kan wan rah ia ka jingiajan hapdeng ka bank bad u ne ka ba shim ram bad ka pynsuk ha ka jingiadei kam dei jam ban hapdeng jong u ne ka bad ka Bank.
Ha ka jingkren u bah A.S Mukhim ba dei SDO jong ka Sohra Civil Sub Division u la ong ba ka long kaba don kam ia ki briew ba kin plie ia ka akkount jong ki ha ki Bank namar ka pynsuk ia ki ha ka por ba ioh ia ki jingiarap na ka sorkar bad khamtam ha kaba ia dei bad ka jingsiew ia ka pisa bai bylla shispah sngi MNREGS.
Ha kane ka sngi na ka liang jong ki ophisar ka RBI kila batai bniah bun ki jingdon kam ha kaba ia dei bad ki kam Bank, kiwei kiba la ia don lang ha kane ka sngi ki long u bah O. Nongbri, Managing Director, Meghalaya Cooperative Apex Bank Ltd.
Ka Tshering Diki, Chairperson, Meghalaya Rural Bank, Bah. P. Tynsong, BDO, Laitkroh Khatarshnong C& RD Block, bah. L. Hangmuanthang, Assistant General Manager, RBI, Shillong , u Rangbah Shnong ka Mawkdok, kiwei ki heh jong ki bank bapher bapher bad kum juh ki nongialam jong ka Khyndai Kyntoit Social and Cultural Organisation (KKSCO) among others.
