Shillong, Jylliew 04: Ka jingniew vote mynta ka sngi kala kdew ba ka kynhun National Democratic Alliance (NDA) hapoh ka jingialam jong ka BJP la khim lynti kan jop 293 ngut ki MP, katba ka kynhun INDIA la antad ba kan ioh tang 232 ngut ki MP bad kiwei kiwei party kila jop 18 ngut.
Haba phai sha ki party, ka BJP kala dei ka party ba jop bun eh ki MP sha ka Lok Sabha kaba khatphra kat haduh ba thoh ia ka khubor por 10.28 baje myn miet, ka website jong ka Election Commission jong ka Ri India ka kdew ba ka BJP marwei kan ioh 240 ngut ki MP.
Ka party Indian National Congress (INC) ka pyni ba kan poi sha ka jingjop 99 ngut, Ka Samajwadi Pary ka jop 37 ngut, ka All India Trinamool Congress kala jop 29 ngut, ka Dravida Munnetra Kazhagan kala jop 22 ngut, ka Janata Dal (United) kala jop 12 ngut bad ka Telugu Desam kala jop 16 ngut. Katba kiwei ki party ki jop duna bha.
Ha kane ka kynti kaba mynta ka BJP kam shym ioh shuh ia ka jingbun paid kaba tang marwei kumba ka long ha u snem 2014 bad 2019, ha kane ka kynti kaba mynta ruh ka don ka jingkyrmen ba ka BJP kan dang ioh ban ialam ia ka sorkar kaba thymmai.
Kat haduh ba thoh ia kane ka khubor ha ka por 10.43 baje myn miet na ki 543 tylli ki Lok Sabha MP Parliamentary Konstitwensi la dep ban pynbna 471 bad kiba dang sah ki long 72 tylli ki konstitwensi, ia kaba ka Election Commission ka Ri India kan dang hap ban pynbna.
