Shillong, Jylliew 22: Ha dien ba ka Khasi Hills Autonomous District Council ka la weng noh ia u bah Shemphang Thabah kum u Lyngdoh jong ka Hima Sohiong lyngba ka hukum bala pynbna paidbah ha ka 14 tarik u Jylliew 2024 kumta na ka liang ki khun ki hajar jong ka Hima Sohiong ki la kyrpad ia ka District council ba kan pyndep noh khamkloi hapoh shibnai ha ka ban jied ia u Lyndoh ba thymai jong ka Hima Sohiong.
Ha ba ioh ban ia kren bad ki nongthoh khubor ha Shillong press club mynta ka sngi thohdieng ka 21 tarik u Jylliew 2024 na ka liang u bah Purningstar Shabong u ba dei u shongknor jong ka Joint Action Committee jong ki khun ki hajar jong ka Hima Sohiong u la ong ba na ka liang ka JAC ka kyrpad ia ka KHAD cba ka dei ban pynkloi noh ia ka jing jied ia u Lyngdoh ba pura jong ka Hima Sohiong lakumo kumo ha poh ka shibnai.
U la ongruh ba ka jingjied ia u Lyngdoh jong ka Hima ka dei ban long da ki Khun ki hajar jong ka Hima hynrei ym tang da ki saw Lyngdoh ki ba juhleh ha ki snem ba la dep noh.
ka JAC ka la dep ban ia khun la san snem halor kane ka bynta ban weng noh ia u Lyndoh jong ka Hima, ha kane ka jing ia khun na ka liang ka JAC ka la hap ban mad ia ki jingshah ban bein bad ki jingshah kynthoh bad ka la don ruh ka jingshah pynngat kyndon ai ia ki dkhot jong ka JAC.
kumta ka jingiaid lynti jong ka JAC ka la poi sha ka thong ha ka ba na ka liang ka Council ka la hap ban weng ia u Lyndoh ka Hima Sohiong u bah Shemphang Thabah.
U la ong ruh ba na ka liang ka JAC kam lah khlem da ai khublei ia baroh ki ba la ia don bynta ha ka ban kyrshan ia ka JAC khamta ia u CEM, Deputy CEM jong ka KHADC bad ia u MDC ka Sohiong ki ba la pdiang ia ki jingdawa jong ka JAC.
