Khliehriat, Nailur, 13: Ka East Jaintia Hills Truck Owner bad Transporter Association (EJHTO&TA), ha u kyrwoh ba la phah da u President jong ka, u Kyrshan Dkhar, ka seng ka ai ia ka jingkyrshan kaba pura ia ka Synjuk Waheh Shnong East Jaintia Hills District, ia ka Khasi Students’ Union-Narpuh Circle bad ruh ia ka Jaintia Students’ Movement –Eastern Region halor ka jingaipor (Deadline) jong ki ia ka sorkar ba kan maramot noh wut wut ia u surok National Highway-6, u ba la sniew shisha mynta shaba palat u pud.
“ ka surok NH-6 u dei u thied snam bah ym tang jong ka jylla Meghalaya, hynrei jong kiwei pat ki jylla ha thaiñ shatei lam-mihngi jong ka Ri India. Ka jingsniew palat jong une u surok ym tang ba ka la ktah mationg ia ki paidbah nongleit nongwan, hynrei ka la buh ruh ha ka jingma kaba khraw bha ia ki kali motor bad khamtam eh ia ki mynsiem briew ba kordor, kiba dei iaid lyngba jong une u surok”, ong u Bah Kyrshan Dkhar, President jong ka EJHTO&TA.
“ Ka surok, ka nam te, National Highway, tangba ka kam pat tang kum u surok pohshnong ruh ym I kop re”. U paidbah ia mynta u la la sah ha ka jingdum namar ngim tip doh aiu sha lyndet, kat haduh ba ki bor sorkar ba dei peit ia une u surok ki la shu ieh la beiñ shisha beit ia u haduh katne katne, i kumba ki paidbah ba don kali ki khlem siew ia ki khajna surok, kat haduh ba ki kali naduh kiba heh haduh kiba rit tam bapli kim long shuh ban iaid lynti lyngba jong une u surok,” bynrap biang u Bah Kyrshan Dkhar.
“Ki paidbah baroh ia mynta ki la bitar jur bha halor ka jinglong jingman jong kane ka NH-6. Kumta na ka bynta ka bha ka miat jong u paidbah, ha ka jingiadei bad ka jingsniew palat jong une u surok, ka EJHTO&TA, ka dawa na ki bor ba dei peit naduh ka sorkar jylla haduh ka sorkar pdeng ba ki dei ban maramot noh wut wut ia une u surok u ba dei u budlum jong kiba bun ki jylla ha ka Ri India, khamtam eh ia ka Meghalaya.
Ka ka jingiadei bad kane, ka seng, EJHTO&TA, ka ai ia ka jingkyrshan kaba pura ruh ia ka SWS East Jaintia Hills District, ia ka KSU Narpuh Circle bad ruh ia ka JSM Eastern Region ki seng kiba la iaid lypa shakhmat ban ai por (Dealine) ia ki bor ba dei peit ban maramot noh wut wut ia une u surok” la pynkut u kyrwoh na ka EJHTO&TA.
