Shillong, Rymphang 04: Ka seng JSU lyngba ka Shillong circle ka lah kyntu ia u paidbah ba dei ban ai jingkyrhshan lang ia ka Meghalaya Joint Action Committe of Commercial Vehicle halor ka jingsangeh kamai khlem buh por namar ka jing pynkiew dor umphniang palat pud ka sorkar.
Ka seng lyngba u General secreatry ka Shillong Circle u samla Request Pakma u lah pynkynmaw ba ka dor petrol kadei tang 69 tyngka ha u shuwa ka jingkhang dam na ba pur u khniang Corona hynrei haduh mynta ka umphniang kali ka lah kiew dor ha man la ki sngi bad ka lah jan poi haduh 100 tyngka haka shi litre.
U Samla Pakma u la ong ka jingleh ka sorkar ka ktah jur ym tang ia kiba duk ba suk hynrei wad iaki khynnah pule namar ka jingkiew dor palat ka bai kali ,kumba ju long mynshuwa ki khynnah pule na Jowai ha Ummulong ki hap ban siew tang 10 tyngka hynrei mynta lah ioh jingtip ba ki lah siew haduh 50 tyngka marwei.
ka bai kali hapoh sor kum na Madanryting sha Khyndai lad ki paidbah ki hap ban siew haduh 50 tyngka marwei bad kane ka buh jingeh khamtam ia ki nongbylla sngi bad kiba duna ka jingioh .Ka seng ka lah pynpaw ruh ba kane kam dei na ka daw ba ki taxi kamai ki shim kabu hynrei kadei haka jing bym banse na ka jingkiew palat ka dor petrol bad diesel.
Ka seng ka lah ong ruh ba ka sorkar ka dei ban sngap ia ka jingeh u paidbah namar naduh u snem 2020 hapdeng ka jingkhang dam na ba pur uta u khniang COVID ki paidbah ki shem jinjar ban pynbiang pyndap hala ing bad ki taxi kamai ki shem jinjar ban ioh siew ia ki ram kali sha ki Bank bad kabai kamai shaki trai kali hynrei hadien ba lah ai lad ban kamai.
Ka JSU ka ong ba mynta lah kynduh pynban sa da kawei pat ka jingeh bad kane ka jingleh ka sorkar ka pynbitar ia u paidbah baroh bad khamtam eh ia ki nongiew,kali kamai,ki khynnah pule bad kiba bylla nongsngi namar don ruh kiba hap ban pep trei namar bym ioh siew bai kali namar ba ka dor kali ka lah rem than.
U samla Request Pakma u lah ong ba ka sorkar kadei ban pynhiar dor noh mardor iaka dor umphniang kali bad ymdei ban shim khajna kaba heh tang na ka petrol bad diesel,u lah ong ka sorkar ka dei ban wad ki lad ki lynti kumno ban wanrah ne pynioh khajna da kawei pat ka rukom namar ka jingpynkiew dor palat ia ka bai umphniang kali la long kumba knieh jubor ia ka pisa jong u duk u suk.
