Shillong, Iaiong 16: Ka KSU South West Khasi Hills District lyngba ka kyrwoh na u samla Michael Dingan, Assistant General Secretary ka seng ka ai iaka jingkyrshan pura iaka jingdawa jongka Mawkyrwat Electricity Consumers Forum ( M.E.C.F ) ba ka MePDCL ka dei ban phlei madan iaka jingiasoi soskular ne Memorandum of Understanding jongka bad ka kompani Feedback Energy Distribution Company Limited ( FEDCO) hashwa ban aiti ia ka jingpyniaid bording ha kane ka kompani bad ruh halor ka jingdawa ban pynshai paitbah shwa iaka rukom treikam jong kane ka kompani khnang ban pynthikna ba kan nym don kano kano ka jingkhniot bein iaki paitbah jongka Thain.
Ka seng haka jingshisha naduh ka 28 tarik jong u bnai ba lah dep ka la leit ban iakynduh ia u Chief Engineers Commercial jong ka MePDCL ha Lumjingshai, Shillong ha kaba ngi la dawa na u iaki artylli ki jingpynshai, ba ka MePDCL ka thmu ban aiti tang iaki Ar tylli ki Sub – Division ha Khasi bad Jaintia Hills kata iaka Mawkyrwat bad Mawsynram kumta ngi la dep pynsngew bad dawa ba ka MePDCL ka dei ban phlei madan iaka soskular bad ban pynshai paitbah shwa iaka rukom pyntreikam jongka kompani nangne shakhmat.
Ka KSU kala ong iaka MePDCL ba ka dei ban lum iaki Nongialam shnong haki lai tylli ki jaka , kata ha Mawkyrwat, Ranikor bad Mawsynram khnang ba ki paitbah bad ki nongialam shnong kin sngewthuh shai la kin pdiang ne kin kyntait ia kane.
Ka seng kumba ka la ju lap ba ha man ba wan ki kompani nabar ka don ruh ka jibgrungkam jongki bar jylla bad kane kan kthah iaka kamai kajih bad iaka influx hapoh ka thain. Kumta, ngi la dawa na u Chief Engineer ba u dei ban pynthikna ba kan nym don ka jingwanrung kam jongki briew ba nabar lem kumta naka liang jongka seng kam banse ban hap pyrshah ia kane namar kane ka dei ka bynta ba ngin nym Lah ban iapein lano lano ruh.
Ia kine ki jingdawa jongka seng watla naka liang jongka MePDCL ka la kular hynrei ngi sngew ban pynrem jur iaka naba haduh mynta kam pat shym la wan lum iaki nongialam shnong bad ki paitbah haki lai tylli ki jaka ba u Chief Engineer u la kular ia ka seng.
Ka seng KSU ka dawa namar kata ba ka dei ban wan lum noh iaki paitbah hashwa ban kut une u bnai bad ban pynthikna ba kin sngap iaki jingeh kiba ki paitbah ki wanrah lem kumta ka seng kan ai jingkyrshan ba pura iaka M.E.C.F ban pyni daka Kam.
Ka Seng ka ban biang ruh iaka jingkyntu jongka M.E.C.F ba ki paitbah kim pat dei ban Siew bill lights haka kyrteng jongka FEDCO katba naka liang ka tnad ba dei peit kam pat lah ban pynshai bniah halor kane ka bynta. Ka kyrwoh na u samla Michael Dingan, Assistant General Secretary KSU South West Khasi Hills District
