Shillong, K’lyngkot 23: Ka seng na Mawsynram ka la mih madan ban kyrsum politik da kaba pynbna paidbah ban kyrshan ia u kyrtong ka Congress u bah Pynshngain N Syiem ha kane ka elekshon ban wan.
Kane ka seng kaba la tip kyrteng kum ka Mawsynram Constituency Development Society (MCSD) ka la khlei ban kyrshan radbah ia u Bah Pynshngain hadien ba u la kular ban buh ia ka iing ki nong-Mawsynram ha Shillong bad ban buh ia ka library ha Mawsynram lada un jop biang ha kane ka kynti.
Kane ka Society kaba la thaw ha u Rymphang mynshem snem, ka la kam ba ka la leit sha man ki shnong ha ka Mawsynram constituency ban iakynduh ia ki paidbah, ki rangbah shnong, ki nongialam Seng Samla bad ki Seng Kynthei.
Baroh ki mynjur ba dei ban don ka iing jong ki Nong-Mawsynram ha Shillong. Ki paidbah jong ka constituency kiba wan na ki bynta bapher bapher sha kane ka nongbah, kiba wan shah sumar, bad kiwei ki kam kyrkieh ki shem jingeh ban ioh jaka sah lait noh kiba don ba em kiba sah sha ki hotel” la ong u president ka MCSD u Bah Diralson Dkhar haba kren hynne ka sngi sha ki lad pathai khubor.
U la ong ba kine ki iing jong ki Nong-Mawsynram kin iarap ia ki khynnah pule, ki samla pule ban wan sah sha kane ka nongbah. “Ngi la tyrwa ba dei ban buh ia ka jaka hikai computer khlem jingsiew ia ki samla na Mawsynram,” la ong u Bah Diralson.
Nalor kane, u la ong ba u pan ia ka jingpynthikna na u Bah Pynshngain ba dei ban don ka pisa kyrpang na ka bynta ki khusnam jong ki samla ne ka Annual Academic Excellence Award jong ka Mawsynram.
Shwa ban kyrshan ia u Bah Pynshngain ki la iashong pyrkhat iano ban jied napdeng kiba ieng ha kane ka kynti bad ha kaba khadduh, la iarai ban kyrshan ia u bah Pynshngain.(SP News)
