Shillong, Jymmang 08: Mynta ka sngi u Secretary jong ka Hima Nongspung u Bah Michael Warjri u la leit ban ai ia ka jingujor sha ki pulit pyrshah ia kito ki briew kiba la wan ban pynpra ia ka jingsah jong u ha shnong Balakhwa kaba hap hapoh jong ka Ri Bhoi District.
Haba kren ha u SP News Agency u wei na kiba ha iing jong u Secretary ka Hima Nongspung la iathuh ba mynta ka sngi kila ai ia ka jingujor sha ki pulit pyrshah ia kitei ki briew kiba la wan ban thombor iing ka sem.
La iathuh ba mynta ka sngi la wan ban ia kynduh ia ka Deputy Commissioner jong ka Ri Bhoi District bad kum juh ia ki heh pulit ban iathuh ha ki bor sorkar ba dei peit ia ka District ia kaei kaba la jia, halor katei ka jingshah thombor.
Na ka liang jong kiba ha iing kila pynpaw ia ka jingsngewnguh ia baroh ki seng bhalang kiba la wan ban iarap ia ka iing ka sem ha kane ka jingjia kaba sngewsih, khlem da jer kyrteng iano iano hynrei ki ai khublei ia baroh.
