Shillong, Nailar 30: U Bah Pius Marwein MLA bala jop ia ka elekshon shiteng samoi na ka 35-Ranikor (ST) Assembly Konstitwensi mynta ka sngi la pynbam smai ia u kum u MLA ba pura da u shongknor jong ka iing dorbar thawain ka jylla u Dr Donkupar Roy ha ophis trei kam jong ka Meghalaya Legislative Assembly.
Ia kane ka jingbam smai jong u MLA ba thymmai, la sakhih lang na ka kynhun jong ka sorkar MDA, ha kaba la don lang u Bah AL Hek, na ka BJP, Bah Reniton Tongkhar HSPDP, Bah Lakmen Rymbiu UDP, Bah Sniawbhalang Dkhar bad u Thomas Sangma bad u Deputy Speaker u Timothy Shira NPP.
Ha kane ka sngi da ki spah ngut kiba ha iing ha sem jong u Bah Pius Marwein kila ia don lang ban sakhi ia kane ka sngi sah kynmaw ba u wei na kiba ha iing ha sem um shim smai kum u MLA jong ka iing dorbar thwain ka jylla.
Haba kren ha ki nongthoh khubor ha dien ba la dep ka jingpynsmai na ka liang jong u Bah Pius Marwein u ong ba ka jingjop ka jong u ka dei na ka jingiatrei shitom da baroh ki nongkyrshan jong ka party, na duh ki nongialam kiba halor, ki minister, ki MLA, ki MDC bad baroh ki nongkit kam jong ka party bad u ai khublei ia ki baroh.
Haba jubab ia ka jingkylli halor ka jingkam jong u wei na ki nongkyrshan ka UDP kumba la paw ha ki lad pathai khubor ba ka seng Congress kala don bynta lang ha kaba pynjop, na ka liang jong u Bah Pius u la kyntait ia kane ka ong bad u la ong ba kam don ei ei kaba kum katta bad ka seng Congress ruh ka don la u jong u kyrtong.
