Shillong, Nailar 07:Ki paidbah jong ka thain Ri Bhoi sepngi ki iai mad ia ka jingeh na ka por sha por na ka daw ka jingduh light khah khah bad la saw sngi mynta ki shongdum bym don bording ha Ri Bhoi sepngi.
Haba kren bad u Nongthoh khubor u bah Najim Kharmalki, President ka Western Ri Bhoi Dorbar uba long ruh u rangbah shnong ka Patharkhmah ula ong, ka jingduh bording ka la ktah ia ki paidbah khamtam ha kane ka juk saian bad teknoloji kiba bun ki briew ki treikam da ka network ha ka khaii pateng, ki kam ophis bad kiwei.
Ula bynrap kane ka jingduh light khah khah kam ktah tang ia ki paidbah hynrei ka ktah ruh ia ki ophis sorkar kiba don ha katei ka thain ban treikam bad bun ki hap mareh sha Nongpoh ban ioh pyndep kam, kumjuh ka ktah shibun ia ki hospital kiba ai jingsumar ia ki nongpang kum ha PHC Patharkhmah, Warmawsaw, Jirang, ki jaka pule bad kiwei kiwei.
U la ong, ka light ha Ri Bhoi sepngi ha kine ki sngi ka long kum u ‘Leilieh ka shu thabah kynsan bad jah jlang da ki sngi bad taiew, katba ka bill pat ki hap ban siew beit man u bnai sha ka MeECL.
“Kane jingleh bym shimkhia ki bor ka MeECL ban pynbiang bording ka la pynbitar ia ki paidbah namar ki duh lut ki kam ki jam baroh bad ka pynpaw kumba ka don eiei sha lyndet ki kam bamsap da ki nongtrei” ula ong bad bynrap namar haba phone ban pyntip sha ki nongtrei ki shu ai daw beit bad kynnoh ia ka mariang ba khyllem ki dieng ki siej khamtam ha kine ki por slap bad ki wat ha ka por tlang ruh ka jubad ka long kajuh.
U Bah Najim ula kyntu ia u Myntri ba peit ia ka tnat bording ban shimkhia ban peit lem ia kane ka jingeh ki paidbah ka thain Ri Bhoi sepngi bad ia ki nongtrei ka MeECL ban shimkhia lang na bynta ka jingmyntoi ki paidbah bad ba ki paidbah ruh kim ym khohnioh ban siew bill sha ka MeECL.
