Shillong, Naitung 10: Bah Martin M Dan
ggo, MLA barim ka Ranikor Constituency, u la ong ba ka shong ha ki paidbah ban rai iano kin kyrshan ha ka ilekshon shiteng samoi ban wan.
“Ngi la iakhun tyngeh ban ioh iaka Ranikor Civil Sub-Division bad nga la hun bad lada ki kwah ban nym kyrshan ia nga ruh nga pdiang sngewbha ia ka rai ki paidbah”, la ong u Bah Martin M Danggo, uba la weng noh iaka jinglong dkhot ka Ing Dorbar Thaw-ain ka jylla ha ka 21 tarik u Jylliew, 2018, ha ka jingialang plie mawnongrim ia ka Ranikor Civil Sub-Division ha Ranikor. “Nga la hun bad ngam sngew eiei wat lada ngan rem ha ka ilekshon bad mynba nga dang don bad ka Congress, ngim shym la ioh ia kiei kiei kiba ia dei bad ki kam pynroi
“Ka dei ka lawei na ka bynta ki khun jong ngi bad ka Sub Division ka jingmyntoi ia baroh… Phin suk la ka long ha ki kam skul bad kiwei kiwei”, la ong u Bah Danggo, uba la iehnoh ruh iaka jinglong dkhot na ka Congress ha u bnai ba la dep ban pynkhreh pat mynta ban iakhun na ka NPP ha ka ilekshon shiteng samoi ban wan.
“Ka daw ka jingresain ka long ban ioh ia ka Sub Division…. Phi lah ban sngewsih balei u MLA u resain tang na ka bynta ka Sub Division hynrei nga buh jingkylli ia kiwei ki seng sain-pyrthei… Balei ngi iakhun Election? hynrei ka dei na ka bynta ka roi ka par,”, la ong u Bah Danggo.
“Khamtam ka Ranikor kaba dang dei hok ban ioh ia ki kam ban kyntiew ia ka roi ka par…. Ki bishni ia nga da kaba thmu ban wan ia khun election. Haba ki kylli ia nga ba balei nga hap ieh ia ka jinglong MLA, ka dei na ka bynta ka Ranikor”, la ong u Bah Danggo uba la pynwan sur jingrwai – ‘Namar jong phi ko baieid ko Ranikor.’
“Ka jingbatai shaphang ka synshar paidbah (Democracy) da u Abraham Lincoln ka long na ka bynta u paidbah da u paidbah… hynrei ha ka kane ka juk mynta ka jingbatai ‘democracy’ – lada phi leh bha shah kynnoh bad lada phi leh sniew ruh shah kynnoh”, la ong u Bah Danggo.
“Ngan leh katba mon bad lada ngam long MLA ruh biang bad balei nga long MLA? ban wanrah Civil Sub-Division”, la ong u Bah Danggo, uba la kynthoh ia ka jingkynnoh kiwei pat ba u la resain MLA ba u kwah myntoi shimet.
“Lyngba ka jingisynei ka sorkar MDA ia ka long ka man ka thain Ranikor bad ngi sa ioh ia ka Civil Sub-Division”, la ong u Bah Danggo uba la pynpaw jingkynthoh ba ki don ruh kiba pyrshang ialam bakla da kaba pynpaw ‘Ia ka Civil Sub-Division te pdiang hynrei ia u Danggo ban pynjot noh”.
“Hato phi kwah pynrem…. Nga pdiang sngewbha bad lada don kiba kob ban kyntiew kyrdan ia ka Civil Sub-Division hapoh shiphew snem bad lada phim lah wat kren bein”, la ong u Bah Danggo uba la pynpaw ka jingiaroh ia ka sorkar MDA ka ba don ka jingthmu ban wanrah ia ka synshar shajan u paidbah.
“Kiba bishni kim pyrkhat ia ka lawei…..Nga kyrmen ba ka Sub-Divison kan pynmyntoi ki paidbah”, u la ong shuh shuh bad ong ba u la sngewhun bad bynrap, “Nga khlem mut ban iakhun ilekshon MLA hynrei nga kwah pynpaw jingsngew nguh ia ka sorkar MDA bad nga la kohnguh ban iakhun ha ka ilekshon shiteng samoi na ka NPP”,.
Haba kylli ia u kumno ka jingpynkhreh jong u na ka bynta ka ilekshon shiteng samoi, u Bah Danggo u la ong, “Ngi la bunkam ka jingpynkhreh ha kaba ia dei bad ka Civil Sub-Division bad mynta ka sngi ka jingdawa ka la urlong. Nga khlem pat pyrkhat eiei ha kaba ia dei bad ka ilekshon shiteng samoi bad lehse ha ki sngi ban wan ngan sa pyrkhat bad ia pynbeit ia kane”.
“Nga sngew kmen ba ngi la ioh Civil Sub-Division bad ngam pat pyrkhat eiei halor ka ilekshon”, u la ong. Haba kylli, u la ong, “Kan nym shim por slem ban rung sha ka NPP kumba nga la mynjur kum ka jingsngew nguh ban iakhun na ka NPP bad ngin sa ia mir jingmut bad ki nongkitkam bad nongkyrshan jong nga”.
“Nga la hun bad ngam sngew eiei watla ngan rem noh ha ka ilekshon bad mynba Nga don bad ka Congress ngam shym la ioh ia kane”, u la ong bad bynrap ba u don jingshaniah skhem bad ki nongkyrshan jong u.
“Ka jingiatrei lang kumba ngi la trei shi katta bad Nga pdiang sngewbha ia ka jingwan iakhun pyrshah jong uno uno u kyrtong uba kwah ban iakhun bad ai ki paidbah kin rai”, u la ong shuh shuh.
Haba kylli ka don kano kano ka jingpyrshang ka Congress ban pynliem noh ia u ha kane ka ilekshon shiteng samoi, u Bah Danggo u la ong, “Ngam don eiei ban ong hynrei ka shong ha ka jingstad jong ki bad kiba kwah iakhun ialeh ilekshon ki kwah ban kyntiew ia ka roi ka par bad ka shong ha ki lehse ki don la ka jong ka rukom pyrkhat”.
“Lada ki lah ban ioh ia ka jingkyrshan na u paidbah bad jop lehse ki lah ban kyntiew kham bha ia ka roi ka par. Lehse ha ki san snem ne shiphew snem ki lah ban pynioh District te nga pdiang sngewbha ia kata”, la ong u Bah Danggo.
