New Delhi, k. Lyngkot 27: Ka Tnat kam Pohiing jong ka Sorkar Pdeng ka la pynmih hukum mynta ka sngi ryngkat ki Jingbthah na ka bynta ka jingpeit bniah, ka jingtehlakam bad ka jinglong phikir, ki ban treikam naduh ka 1 tarik Rymphang, 2021 bad kin iaineh haduh ka 28 tarik Rymphang, 2021.
Ka jingphaikhmat ba kongsan jong kine ki jingbthah kalong ban pynneh ia ki jingjop ba la ioh ha ka jingialeh pyrshah ka jingpur ka COVID-19 kaba la iohi lyngba ka jinghiar ka jingdon ki case ba dang iaid bad ki case ba thymmai ha ka ri ha kine ki saw bnai ba la leit.
Kumta, la ban na ka bynta ban jop ia kane ka khlam, donkam ban pynneh ka jinglong phikir bad ban bud pyrkhing ia ki rukom treikam da kaba phaikhmat halor ka jingpeit bniah, ka jingtehlakam bad ka jingbud pyrkhing ia ki jingbthah/ SOP ba la pynmih da ka Tnat Kam Pohiing bad ka Tnat ka koit ka khiah jong ka Sorkar Pdeng.
Ka Jingpeit bniah bad ka Jingtehlakam, Lada donkam, yn buh dak ia ki Containment Zone, da ki bor pyniaid distrik ha ka kyrdan ba rit, da kaba pyrkhat ia ki jingbthah ba la mynjur da ka Tnat ka koit ka khiah jong ka Sorkar Pdeng halor kane. Hapoh u pud Containment Zone, dei ban bud ia ki lad ba iadei bad ka jingtehlakam kumba la mynjur da ka tnat ka koit ka khiah jong ka Sorkar pdeng.
Ki bor pulit bad ki bor pyniaid municipal ha ka distrik kidei ban pynthikna ka jingbud ia ki lad jingiada ba iadei bad ka jingtehlakam bad ki Sorkar Jylla/UT kidei ban pynthikna ka jingkitkhlieh jong ki ophisar ba dei khmih halor kane.
Ki rukom ba iadei bad ka COVID, Ki Sorkar Jylla UT kidei ban shim baroh ki lad jingiada ba kongsan ban kyntiew ia ki rukom ba iadei bad ka COVID-19 bad ban pynthikna ka jingdeng ia ki jingda khmat, ka jingleh khuid ia ki kti bad ka jingiajngai iwei na iwei.
Yn dang bteng ban bud ia ki jingbthah ha kylleng ka ri ba iadei bad ka jingiada na ka COVID-19, khnang ban lah ban pyntreikam ia ki lad jingiada ba iadei bad ka COVID-19
Ka jingbud ryntih ia ki SOP ba la buh, La pyllait baroh ki kam shabar ki Containment Zone, lait noh kine harum, ba dei ban bud pyrkhing ia ki SOP.
La shah lypa ia ki jingialang ha ka imlang sahlang, kiba iadei bad ka niam, ki jingialehkai, ki jingpynbyrnia, ki kam ai jinghikai, ka kolshor kat haduh shiteng ka jinglah pynrung briew ha ka jaka ba pynlong ha kaba ym long ban tam ia ka 200 ngut ki briew ha ki jaka bym dei shabar; bad ka jingpeit ia ka jingheh ka jaka lada kine ki long ha ki jaka shabar iing. Mynta la shah ban pynlong ia kum kine ki jingialang da kaba bud ia ki SOP jong ki Jylla bad UT.
Katba la shah ban plié ia ki cinema hall ha kaba shah rung tang shiteng ka jinglah pynrung briew kine ki jaka. Mynta yn shah ban kham pynbun shuh shuh ki nongrung ha kine ki jaka bad na ka bynta kane ka Tnat Information & Broadcasting kan sa pynmih ia ka SOP ha ka jingiamir jingmut lang bad ka Tnat kam Pohiing jong ka Sorkar pdeng.
Ladep plie ia ki swimming pool na ka bynta ki nongialehkai. Hynrei mynta ia ki swimming pool yn plié ia baroh, bad ia ka SOP ba thymmai yn sa pynmih da ka tnat kam ialehkai jong ka Sorkar pdeng ha ka jingiamir jingmut bad ka Tnat kam pohiing jong ka Sorkar pdeng.
Ladep plié ia ki Business to Business (B2B) exhibition hall. Hynrei mynta la ai jingbit ban plié baroh ki jait hall pyni tiar, bad ia ka SOP ba thymmai yn sa pynmih da ka Tnat Commerce ha ka jingiaphylliew jingmut bad ka tnat Kam Pohiing jong ka Sorkar Pdeng.
Na ka bynta ka jingplie shuh shuh ki liengsuin shabar ri, ka Tnat Civil Aviation jong ka Sorkar Pdeng kan shim ia ka rai ha ka jingiaphylliew jingmut bad ka Tnat kam Pohiing katkum ka jinglong jingman.
Ia ki SOP ba la pynthymmai na ka por sha ka por, la mynjur ha ki kam bapher bapher. Kine ki kynthup, ka leit ka wan ki briew na ki rel, ki liengsuin, ki rel metro, ki skul, ki jaka pule, ki hotel bad ki restaurant, ki shopping mall, ki multiplex bad ki park; ki jaka leh yoga bad ki jaka kilan met bad kiwei kiwei. Ia kine ki SOP dei ban pyntreikam da ki bor ba dei khmih.
Ki jingpyrkhing ha ka jylla, Kan nym don kano kano ka jingpyrkhing ha ka iaid ka ieng ki briew bad ka jingkit ia ki mar hapoh jylla bad hapdeng ki jylla kynthup ia ka jingiaid lynti ki mar sha ki ri ba iadon jingiateh bad ka India. Bad ki ri ba marjan. Yn nym donkam ban shim la ka jong ka jingioh jingbit/e-permit na ka bynta kum kine.
Ka Jingiada ia ki briew kiba kham don ha ka jingma, La ai jingmut ia ki briew kiba la don 65 snem shaneng, ki briew kiba la don lypa kiwei ki jingshitom ha ka met, ki longkmie ba armet, bad ki khynnah kiba hapoh 10 snem ban shim ia ki lad jingiada ba donkam.
