Shillong, Risaw 26: Mynta ka sngi 26/Risaw/2026 la pyllait paidbah ha baroh 12 tylli ki Distrik ha ka jylla ia ka kyrteng ki nongthep vote electoral roll katkum ka Special Intensive Revision 2026. Na ka bynta ka East Khasi Hills ia ka jingialang ban pyllait ia ka electoral roll la pynlong ha Mini Auditorium Golden Jubilee NEHU.
Katkum kane SIR ki nongthep vote ha ka jylla Meghalaya ki long 21,83,963 ngut, na kine ki shynrang ki don 10,59,743 ngut, ki kynthei ki don 11,24,216 ngut bad ki bah kong ki don 4 ngut ka jingkiew jong ki nongthep vote ka long da 14,720 ngut.
U Chief Electoral Officer Dr. B.D.R Tiwari haba kren ha ki lat pathai khubor u la ong ba lada don ba ka kyrteng jong ki nongthep vote ka khlem rung ha ka electoral roll ki lah ban phah ia ka jingthoh jong ki sha u ERO hapoh ka 15 sngi bad lada ka dang don ka jing bym pdiang ki dei ban phah ia ka jingthoh sha u Chief Electoral Office hapoh ka 30 sngi.
Ka jingdon ki nongthep vote ha ki 36 tylli ki MLA konstitwensi jong ki 7 tylli ki distrik ha ri lum Khasi bad Jaintia ki don 13,68,334 ngut kiba hap hapoh ka 1-Shillong Parliamentary ST Constituency bad ka jingdon ki nongthep vote ha ki san tylli ki konstitwensi ha ri lum Garo ki long 8,15,629 ngut kine ki hap ha ki 24 tylli ki MLA konstitwensi kiba hap ha ka 2-Tura Paliamentary ST Constituency.
Ki konstitwensi kiba don bun eh ki nongthep vote ka dei ka 5-Sutnga Saipung konstitwensi ka don 49,016 ngut, ka 6-Khliehriat ka don 48,327 ngut, ka Mawlai kaba dei ka konstitwensi kaba bun tam ki nongthep vote ha shuwa ka SIR mynta kala poi sha ka kyrdan kaba lai ha kaba ki nongthep vote ki don 48,014 ngut ki nongthep vote,1-Nartiang konstitwensi ka don 47,000 ngut.
