Shillong, Iaiong 23: Mynta ka sngi ka sorkar Meghalaya kala pyndon burom khatduh ia u Myntri Rangbah barim ka jylla u bah J.Dringwell Rymbai bam kwai ha dwar u blei ha Madan Heh ha Mawlai.
Ha ka jingkren u Symbut myntri rangbah ka jylla u bah Prestone Tynsong u la ong ba ha ka kyrteng jong ka sorkar, ki myntri kabinet bad ki paidbah jong ka jylla pynpaw ia ka jingsngewsih halor kane ka jingkhlad noh jong u Myntri Rangbah barim bad Lamphang ka iing dorbar thawain ka jylla.
U bah Prestone u la pynpaw ba u bah Rymbai u dei shisha uta u nongialam ba la ai ka jingshakri ia ki paidbah ka jylla, ia ki paidbah jong ka Jirang ha ki snem jong ka jinglong noh mihkhmat ka jong u bad u myntri rangbah ka jylla bad duwai ba ka mynsiem kan ioh ia ka jignjahthait bym juh kut.
Ha ka jingkren u bah Metbah Lyngdoh Lamphrang ka iing dorbar thaw ain ka jylla la pynkynmaw ba u bah J.D Rymbai u long shisha u briew ba sngewrit bad ba shemphang ha ka jinglong Lamphang bas symbut Lamphang ka iing dorbar thawain ka jylla kane ka paw na ki jingpyniaid ia ka iing dorbar.
La ong ban a ka liang jong u kum u Lamphang ka iing dorbar bad ha ka kyrteng jong baroh ki MLA jong ka iing dorbar u phah ia ka khubor sngewslem sha kiba ha iing ha sem ka jingkhlad u bah Rymbai la ong ka jingduh kaba khraw ia ka jylla ym tang ia ka iing ka sem.
Ha ka jignkren u bah Sosthenes Sohtun MLA jong ka Jirang kaba u bah JD Rymbai u la mih khmat ia katei ka jaka 25 snem lynter, la pynkynmaw ba ka jingleh jong u bah Rymbai ban wanrah ia ka Block kala pynsuk shibun ia ki paidbah nalor shibun kiwei kikam kiba la kyntiew ia ka konstitwensi.
Ia ka khubor sngewlem na u myntri rangbah ka jylla la pule ka Deputy Commissioner jong ka East Khasi Hills District kong Isawanda Laloo, ha ka khubor sngewlem u myntri rangbah ka jylla u la pynkynmaw ba u la ioh ban ia kynduh ha iing bad la pdiang sngewbha da ka jingphuh samrikhi, kane ka jingkhlad ka long ka jingduh kaba khraw ym tang ia ka iing ka sem hynrei ia ka jylla, duwai ba ai ka mynsiem kanioh ia ka jingjah thait bymjuhkut.
Nalor u symbut myntri rangbah ka jylla bad Lamphang ka iing dorbar kiba la don lang ha kane ka sngi ki long u bah Lahkmen Rymbui, bah Hamletson Dohling, bah Reniktone L Tongkhar, James K Sangma baroh ki dei ki myntri kabinet, u nongialam ka liang pyrshahu Dr. Mukul Sangma.
Ki MLA kiba la don lang ha kane ka sngi ki long u bah Process T Sawkmie, bah Mayralborn Syiem, bah George B Lyngdoh, Zenith M Sangma, Adelbeth Nongrum, ki MDC u Martile N Mukhim ba dei ruh myntri kabinet barim ka jylla, bah Balajied Rani, bah Victor Ranee, bah Teiborlang Pathaw.
Ki ophisar la don u bah DP Wahlang Additional Chief Secretary, kong Ida Nongrang heh pulit, Dr. Andrew Saimon Commissioner Secretary jong ka iing dorbar thawain ka jylla, ha kane ka sngi la don shibun ruh kiwei ki ophisar sorkar kiba la ia don lang ryngkat kiba ha iing ha sem, ka kurim, ki khun ki ksiew bad kiba ha iing ki paralok kiba la don lang ban pyndon burom khatduh ia umyntri rangbah barim ka jylla.
