Shillong, Naiwieng 09: Na ka liang jong ka shnat KSU ha ka skul NEHU kala pyntip ba ia u samla Meban Kharmawlong ba dei nongai khubor ka seng la kem pang na ka daw jong ka jingtlot ha dien ka jingtreishitom ban peit ba kane ka jingiakhih kan long kaba iaid beit.
La iathuh ba mynta u samla Meban u la don sha NEIGRIHMS bad la hap ban leh ia ka eksmin da ka MRI bad la sumar ia u ha ka tnad Neurology bad mynta dang don ha pdeng ka jingusmar hapoh katei ka hospital.
Mynta ka jan meit u shongknor jong ka NESO u bab Samuel B Jyrwa u la leit ban jngoh ia ki samla pule jong ka KSU ha NEHU kiba dang bteng ia kane ka jingiakhih shah thngan ha katei ka skul bah ban dawa na u V C ban weng mardor ia u Registrar bad Deputy Registrar kane ka skul bah.
Ha pdeng kine ki jingiakhih bun ki samla pule na ki jaka bapher bapher kila leit sha NEHU ban ai mynsiem ia kane ka jingiakhih ka jong ki ban dawa ban weng kam mar dor ia ki ar ngut kiba ka seng kala dep ban kdew shai.
