Shillong, Nailur 13: Ka Skul St Joseph Higher Secondary School Pynthorumkhrah ka la pynkut noh ia ka jubilee ba 60 tylli ki snem ia kaba la pynlong myn ha ka 13 tarik u Nailur 2024 ha Phyllaw jong ka Skul.
Ha ka jingpynkut ia ka jubilee jong ka Skul u Abu Taher Mondal Myntri ka tnad Pynmih Bording ka Sorkar Jylla u la long u kongsan ban pynhap pyrda ha, ka jingiadon lang ka Principal ka Sister Madonna Lytep.
Ha kane ka sngi la don lang u Secretary ka skul Managing Committee u Fr. Laurence Nongkseh, u Bah Dominik Sawkmie, u President Bah Frederik Lyngkhoi bad ki nonghikai kumjuh ki kmie ki kpa jong ki khynnah skul.
U A.T. Mondal myntri ka sorkar jylla haba kren ha kane ka sngi kum u kongsan u la ai jingiaroh ia ka skul Managing Committee kaba la pyntyllun ia ka skul sha u Mawmer ba 60 tylli ki snem.
Kam long kaba suk ban kynmaw ia ki diengpynkiang jong ki snem ba laleit noh lada peit ia ka dur jong ka Iing skul ba nyngkong da ka Iingtrep mynta pat da ka Iing maw kaba paka pynsngew u AT. Mondal.
Kane baroh ka dei ka jingtrei shitom ki longshwa bad ba iohi jingai ki nongseng. Na ka liang ka Principal jong ka skul ka Sister Madonna Lytep ka pynsngew ba ka khana samari ia ka skul bad ki kam jong ka skul bad ki khynnah.
Katba ki khynnah skul pat ki la pynpaw lang ka jingkmen kaba khraw ia kane ka skul kaba la ai jinghikai kaba paka shuh shuh ki khynnah skul ka St Joseph ki la ioh ban pyni bad ai prokram sah kynmaw lyngba ka jingrwai “U Sim Pyllieng ba bun rong ha ki 60 tylli ki snem”
Shuh shuh ha jingpynkut ia ka lynti iaid ba 60 tylli ki snem ka Skul ka pynkup burom ia ki nonghikai kiba la hikai 25 snem kiba kynthup ia ka Kong Anna Maria Wahlang bad ka Miss Bobyta Lyngdoh. Ka skul ha Diamond Jubilee ka la ai khusnam bad memonto ia ki khynnah skul kiba wan shakhmat duh ha ka Eksam Matrik ha ki 10 snem ba la dep.
