New Delhi, Jylliew 28: Ka Sorkar India ka la pynkylla ia ka Employees’ Pension Scheme (EPS), 1995 ban pynthikna ba ki dkhot EPS kiba la trei hapoh 6 bnai ka jingiasoh ki ioh lad ban sei pisa. Kane ka jingpynkylla kanai jingmyntoi ia palat 7 lak ki dkhot EPS man u snem kiba mih na ka skhim haba ki dang don tang hapoh 6 bnai ka jingbei tyngka.
Shuh shuh, ka Sorkar Pdeng ka la pynkylla ia ka Table D bad ka la pynthikna ba yn peit ia man u bnai ba la bei tyngka bad yn ai jingsiew ha kane ka nongrim ia kito kiba kwah ban sei noh ia ka pisa.
Nangne shakhmat, ka pisa ba lah ban sei kan shong ha katno bnai ba u dkhot u la bei tyngka bad ruh ka tulop ha kaba la ioh ia ka jingsiew EPS. Kane ka la wanrah ia ka jingryntih ha ka jingsiew ia ki jingsei pisa jong ki dkhot. La antad ba man u snem palat 23 lak ngut ki dkhot kin ioh jingmyntoi na kane ka jingpynkylla ia ka Table D.
Man u snem, da ki lak ki dkhot EPS ki iehnoh ia ka skhim shuwa ba kin pyndep ia ka 10 snem ka jingbei tyngka na ka bynta ka bai bam tymmen. Ia kum kine ki dkhot la ai ki lad sei pisa katkum ki kyndon jong ka skhim.
Palat 30 lak ki jingpang ban sei noh ia ka pisa ki dei kiba la pyndep ha u snem mang tyngka 2023-24.
Haduh mynta, ia ka pisa ba lah ban sei la khein katkum ka por ba la bei tyngka katkum ki snem bad ka tulop ha kaba la ioh ia ka jingbei tyngka ha ka EPS.
Kumta, haba la pyndep 6 bnai kane ka jingbei tyngka, ki dkhot ki la ioh lad ban sei ia ka pisa. Kito kiba iehnoh ia ka skhim shuwa ban pyndep 6 bnai ki ju dei kiba ki bym ioh lad ban sei ia ka pisa.
Ka dei namar kane ba la shah kyntait shibun ki jingpang ban sei ia ka pisa namar bun ki dkhot ki dei kiba mih na ka skhim shuwa ban pyndep 6 bnai ka jingbei tyngka.
Ha u snem mang tyngka 2023-24, la kyntait kumba 7 lak ki jingpang ban sei pisa namar ym pat dap 6 bnai ka jingbei tyngka. Nangne shakhmat, baroh ki dkhot EPS ki bym pat dap 58 snem ka rta ha ka 14.06.2024 ki lah ban sei ia ka pisa.
Mynshuwa, ka rukom khein hapoh ka Table D ba rim kam peit ia ka jingbei tyngka kaba hapoh 6 bnai hadien man u snem ba la pyndep. Kane ka mut ba ki briew ki ioh sei duna ka pisa.
Lyngba kane ka jingpynkylla ia ka Table D, ia ka jingkhein ia ka por ba la bei tyngka ban sei pisa kan long ha ki bnai ba la pyndep. Kane kan pynthikna ia ka jingryntih ha ka jingsiew haba sei ia ka pisa.
Kum ban shu kdew, u dkhot uba sei ia ka pisa hadien 2 snem bad 5 bnai ka jingbei tyngka bad ka tulop kaba 15,000/- ha ka shi bnai u ju ioh T. 29,850/-. Mynta pat un ioh ban sei T. 36,000/-.
