Shillong, Iaiong 29: Mynta ka sngi u Executive Member ka Khasi Hills Autonomous District Council ba dei peit ia ka tnad Elaka u bah Jambor War mynta ka sngi u la pynlait paidbah ia ka kot “Ka Phan Nonglait, A Laday Freedom Fighter of India” ia kaba la thoh da u muktiar u bah Daniel Stone Lyngdoh Nonglait.
Haba kren kum u kongsan haba pynlait ia kane ka kot kan long kawei na ki kot ban pynpaw ia ka jaidbynriew bad kane ka sngi ba pynlait ia kane ka kot ain kan long ka sngi ban kyrsiew ia ka mynsiem ieit ri.
La ong ba 189 snem mynshuwa ka Phan Nonglait la shu sah tang ha ki khana hynrei mynta kala wan ha ka dur jong ka kot bad lyngba kane ka kot mynta la tip sha phang jong ka bad ia ki pateng ban dang wan ban tip sha phang kane ka nongialeh laitluid ka Ri kane ka riew khraw kam don jingiapher na kiwei.
Ha kane ka sngi u EM ba dei peit ia ka tnad Elaka la ong ba shuwa ba ka pyrthei kan ia kren ban ai bor ia ki kynthei, ka jaidbynriew khasi kala dep ban pynkupbor, la ong ba kat kum ka jingkylla ka por ka rukom treikam ruh ka kylla hynrei ki don ki bynta ba ia ka riti dustur ym lah ban pynkylla.
La ong ba kum ka jaidbynriew ka don la ki jong ki riti dustur, ki Hima, ki shnong ki thaw namar ki don ki bynta ba la pynkhambor tang ia ki shynrang, kumta ka long kaba don kam ban pynneh pynsah ia la ka riti ka dustur.
U Bah Daniel Stone Lyngdoh Nonglait ba thoh ia kane ka kot u la kdew lyngkot ba kala shim por haduh 19 snem ban pynmih ia kane ka kot bad kane ka kot ka dei ka nongkynti jong ka KHADC namar dei maka kaba la pdiang ban pynmih ia kane ka kot bad ka jingkhublei kyrpang ka leit sha ka KSU.
U Kaushal Goyal Director bad Chief Executive Officer jong ka Pigeon Pvt Ltd kaba la shon ia kane ka kot la ong ba kane ka kot ka paw bha mynta bad ia kane ka kot pat la die lyngba ka Amazon bad Flipkart, la ong ba ka Phan Nonglait kan long shisha kawei na ki nongialeh laitluid ka Ri India.
Kiwei kiba la kren ha kane ka jingialang paidbah ki long u bah Samuel B Jyrwa Chairman ka NESO, bah Lambokstarwell Marngar President ka KSU seng kmie, Prof Badaplin War, u Syiem ka Hima Nongkhlaw pa,im PM Syiem, Malystar L Nonglait , Bah Powell Sohkhlet, na ka liang jong kiba ha iing la kren da ka kong Macdalyn L Nonglait, ha kane ka sngi la don ruh shibun kiba ha iing ha sem ban ia sakhi lang ia kane ka sngi sah kynmaw.
