Shillong, Jymmang 13: Kum ka jingpynkhreh ia ka International Day of Yoga ha ka 21 tarik Jylliew, ka ophis jong ka Regional Outreach Bureau Shillong ha ryngkat ka Field Outreach Bureau, Nongstoin ki la pynlong ia ka prokram halor ka Yoga ha skul JNV, Mawphlang mynta ka sngi.
Ha kane ka prokram la iashim bynta ki khynnah skul, ki nonghikai bad kito kiba trei ha kane ka skul. La pynlong ruh ia kane ka prokram ban pynsaphriang jingtip shaphang ki bynta bapher bapher jong ka Yoga bad ruh ban kyntiew ia ka jingniew ia ki sngi shuwa ka IDY-2022 na ka bynta ka koit ka khiah bad ka bha ka miat.
Ka tnat AYUSH bad ka tnat Information & Broadcasting, jong ka Sorkar Pdeng ki la pynlong ia ki jingrakhe ha ki jaka bapher bapher kum ka jingpynkhreh ia ka prokram ban pynlong ha ka International Yoga Day.
U Ch. Dineshan, Principal ka skul JNV, Mawphlang kum u kongsan bad u Dr Engam Pame, Director, ROB Shillong ki la kren shaphang ka jingdonkam ban leh yoga man ka sngi.
U Dr. Pame u la ai jingiaroh ia ki sienjam jong ka tnat AYUSH ban pynlong ia ka jingniew ia ki sngi shuwa ka International Yoga Day ha kaba kine artylli ki tnat Sorkar Pdeng mynta ka sngi ki la iashim bynta ha ki jaka bapher bapher jong ka ri.
Ka jingiakop airong ia ki dur, ka quiz bad ka jingkyntiew jingtip shaphang ka yoga ha ryngkat ka jingleh yoga ki dei katto katne ki kam ba la pyndep mynta ka sngi. La ai ruh ia ki khusnam sha ki nongjop jong kine ki jingiakop.
Ka Delicia E Jyrwa, Field Publicity Asst., ROB Shillong ka la ai jingkren pynkut. Kum kine ki prokram yoga la pynlong ruh da ka Doordarshan Kendra Shillong bad Tura na ka bynta ki nongtrei ha kine ki ophis ha ki Doordarshan Studio Complex bapher bapher.
Mynta u snem, katba ka ri ka rakhe ia ka Azadi ka Amrit Mahotsav kum ka dak jong ka jingdap 75 snem ka jingioh jinglaitluid, ka tnat AYUSH ka la sdang ia ka jingniew ia ki 100 sngi kaba la sdang ha ka 13.03.2022 ha kaba la don ka jingiashim bynta 100 tylli ki kynhun.
Ha kane ka bynta, ka tnat AYUSH ka la buh ia ki tarik kyrpang ia ki tnat Sorkar Pdeng ba kin iashim bynta ha ka jingniew ia ki sngi shuwa ka International Day of Yoga da kaba pynlong ia ki prokram leh yoga ba buh nongrim ha ki Common Yoga Protocol (CYP) bad ruh ban pynlong ia ki prokram bapher bapher.
