Shillong, Iaiong 14: U symbud myntri rangbah ka jylla u Bah Sniawbhalang Dhar uba dei peit ia ka tnad Urban Affairs u la pyntip ba ha ka jingialang ba dang shen ka tnad Urban bad ka tnad PWD, ka sorkar ka la rai ban pynsahngeh noh ia ka smart city Road project bad ban aiti noh sha ka tnad PDW ban mang pisa ia ki jingtrei ba dang sahteng.
Haba kren sha ki lad pathai khubor, u myntri ka tnad pynroi sor u bah Sniawbhalang Dhar u la iathuh ba ia ki Project ki ba dang sahteng hapoh ka Smart City Road Project yn aiti noh sha ka tnad PWD jong ka sorkar jylla ba kan pyndep bad halor kane na ka liang ka PWD kan pynkhreh ia ka Detail Project Report (DPR) ban pynbha ia kine ki project kiba dang sahteng ha ryngkat kiwei pat ki surok ha Nongbah Shillong.
U bah Sniawbhalang u la ong, ha kine ki khyndiat sngi, ba wan u slap ki nongshong shnong ki mad jingeh na ka jingsahteng ki katto katne ka Smart City Project ha Nongbah Shillong, la ka dei ka jingshlei um ha ka jingtei ia ka nala ha 4th furlong, ne ha Surok kaba don ha Lashumier kaba la wanrah ka jingkhnium kaba khraw na ki paidbah.
U la pyntip ruh ba kiwei ki project ki ba la pyntrei ha ka Smart City project ki iaid beit iaid ryntih bad bun hi ki project la jan dep bad baroh kine ki jingshna hapoh kane ka project la kyrmen ba ha u snem 2026 kin lah ban pyndep noh.
U symbud myntri rangbah ka jylla u bah Sniawbhalang Dhar, halor ka Railway Project u la ong ba u myntri rangbah u la jubab shai bad shen u myntri rangbah un sa khot ka jingialang bad baroh ki nongialam ka sengsaiñ pyrthei, ha ryngkat baroh kiba don bynta ha kane ka mat ban iakren halor kane ka mat.
Da kaba kdew ruh ba kan ym don kano kano ka jingpyrshang ban wanrah ia ka railway Project, ha ka Jylla khlem da ioh ia ka jingmynjur ba pura na baroh ki nongshong shnong ha ka jylla.
Halor ka jingpynriah ia ki Harijan na them ïewmawlong u la iathuh ba shen ka tnad kan sa khot ia ka jingialang bad ki nongialam ka Harijan Panchayat Committee (HPC) halor ka jingdawa jong ki bun ki dieng pynkiang, kumta dang donkam ban iakren bha bad ngin sa khot biang ka jingialang, la ong u bah Sniawbhalang Dhar.
U bah Sniawbhalang Dhar u la ong ruh haba iadei ka airport, ba ha u snem 2026 kyrmen ba yn ioh ia ka Airport thymmai, kaba ka jingpyntrei mynta ka la iaid shaitshait, bad ka jingsiew ia ki bai jaka la jan dep, bad ki shipai ruh ki la kloi ban iatreilang halor kane.
