Shillong, Risaw 06: Hato ka long ka ba biang ba ki Samla Pule kin shu pule thik tang ia ki kot ba lah bthah ia ki ban pule,ban ioh ia ka kyrdan pule,ban ioh kam ioh jam bad ban shu khaprip ngaiñ bad set sbak iala ka shyntur bad ki skhor ha ba iadei bad kiei kiei ki ba wanrah ia ka jingsniew ha ka imlang sahlang bad ka Jaidbynriew? Kane ka de ka Sur ki Samla Pule NEIAH.
Ka 5 tarik u Risaw 2024 kan dei ka sngi sah kynmaw ha kaba ka KSU ka la ioh ban pynkha ia la ka tnad treikam ha ka skulbah North East Institute of Ayurveda and Homeopathy.
Ïa kane ka tnad treikam kaba la tip kum ka KSU NEIAH Unit la pynskhem bad pyntian smai da u Samla Donald V Thabah, General Secretary ka KSU Central Executive Council.
Ha kane ka lympung pynskhem ia ka KSU NEIAH Unit, la pyniaid da u samla Raymond Kharjana Organising Secretary KSU CEC, bad la sakhi lang da ki nongialam shnong ba kynthup ia u samla Rinelson Suting Assistant Secretary, Dorbar Shnong Mawkasiang Samla Wankit Nongkhlaw Assistant Secretary, Dorbar Dong Mawdiangdiang.
Ki dkhot ka seng u Samla Celestine Rynghang GS KSU Mawkasiang Unit cum member anti-ragging cell, NEIAH, Shelkitbok Kharbani Assistant Education Secretary, KSU CEC, Sonstar Nongkhlaw President, KSU Shillong Mihngi Circle, Advocate Hamarbabiang Wanshong member, Legal Affairs Cell, KSU bad kiwei kiwei.
La pynskhem ia ki dkhot ka KSU NEIAH Unit ha iing shnong ka Mawdiangdiang ba la ioh ki jingkren na ki nongialam ka KSU kiba la kren ha kiba bun ki phang kumno ban iada bad kyntiew ia la Jaidbynriew ha kino kino ki phang kiba donkam.
Ka KSU ka ngeit skhem ba lyngba ka KSU NEIAH Unit lem bad ka jingkyrshan ka KSU hi baroh kawei yn pynskhem ia ka jinglong trai ki samla pule Khasi ha kane ka skul bah bad kumjuh ruh ban peit pyrman ba ki Khasi ba pule bad trei ha kane ka skulbah kin ym shah ban beiñ bad shah leh shiliang ha kane ka skulbah ba la seng ha ka Ri Khasi.
