Shillong, Nailur 03: Ka Synjuk jong ka Seng Samla Shnong Seng Kmie ka la pyniar ia ka shnat treikam jong ka hapoh u pud u sam jong ka Shillong City da kaba ka la ioh ban pynskhem ia ki Nongkitkam bad ia kane ka jingpynskhem kaba la long ha ka 2.09.2023 ha Mawkhar Community Hall.
La pynskhem ia ki nongkit kam da u Chairman jong ka Synjuk Seng Samla Shnong Seng Kmie, Bah Vanshan Buhphang, ha ka jingia donlang ki dkhot jong ka Syngjuk Seng Kmie, bad kumjuh ki katto katne ngut ki riew Rangbah kiba dei ruh ki dkhot barim kiba ju trei shitrhem jong ka Synjuk ha ki snem kiba la leit noh, bad ki Rangbah Shnong jong ki Sor Shillong.
Ka thong jong ka Synjuk Seng Samla Shnong ka dei halor ka jingia don bynta lang kum ka kynhun jong ki khun samla ha man la ki shnong na ka bynta ka bha ka miat bad ban rat diengkhong ia shibun ki jingsniew bad ki dieng pynkiang kiba khang lad khang lynti ha ka imlang ka sahlang.
Ka thong kaba ha khmat ka long ruh halor ka jingbun bad jyllei ka jingkynri jong ki jingdih pynbuiad kum ka Kyaid, Drug bad kiwei kiwei kiba la suh thied bha ha kane ka Ri Khasi baieid bathoiñ ka jong ngi kaba bun na ki khun Samla ki ngop ha kum kine ki jait jingdih pynbuaid kiba la ialam sakma khamtam kia ki khun samla ki jong ngi ha kiba bun rukom.
Ki nongkit kam jong ka SSSS ki long u bah Pynshaibok Diengdoh kum u shongknor, bah Symper Ryntathiang kum u Shngoner ban pyniaid ka kam, u Samuel Biam kum u synbut shongknor, u bah Vivan R Kharkongor kum u general secretary, nalor kitei la jied ruh sa 24 ngut ki nongkit kam.
