Shillong, Nailar 11: La rakhe ia ka International Day of the Worlds Indigenous People, ka sngi jong ki jaidbynriew kiba kyrpang da ka office Anthropological Survey of India, Ministry of Culture, North East Regional Center, ha ka 9 tarik August 2014, ha Shnong Tyniar Village, Raid Diengsaw, Hima Sohra Syiemship, East Khasi Hills District, kaba don kumba 49 Kms na Shillong.
Ka jingkren sdang la ioh na ka Dr(Smt) RR Gowloog, Head Office, Anthropological Survey of India, Ministry of Culture, North East Regional Center Shillong, ka la ai khublei ia u Rangbah Shnong, ki bor Shnong, Raid, bad Hima, bad khamtam ia u Kongsan u Bah John F Kharshiing, ia ka jingkloi jong u ban iadon bynta ha kum kane ka program, bad ka la ong ba ka long kaba donkam ban wad bniah ban tip ia ki rukom im ki jaidbynriew kiba kyrpang ban ban bishar bniah hato ki la nang kylla ha ki rukom im jong ki ne ki dang bud thik ia ki rukom im tynrai haduh kine ki sngi, ka long ruh kaba donkam ban wad ia ki daw kiba lah ban long ka jingma ia ka jingduh noh ki rukom im kiba jong ki jaidbynriew ba kyrpang.
Ka Dr Gowloog, ka la ong ba ka United Nations General Assembly ka la rai ba ka International Day of the Worlds Indigenous People, yn rakhe man ka snem ha ka 9 tarik August 2014. Kane ka Tarik ka dei ka sngi ha kaba la ki bor jong ka UN ki la ia kynduh nynkong eh ha u snem 1982 ha ka UN Working Group halor ki jaidbynriew (Indigenous Populations) jong ka sub-commission halor ka jingkyntiew ka jingiada ia ka Hok Longbriew. Human Rights.
U Kongsan, ha katei ka program, u Bah John F Kharshiing, Co-Chairman, Meghalaya State Planning Board, & Chairman, The Grand Council of Chiefs of Meghalaya, Spokesperson, Federation of Khasi States, u la ai khublei ia ka office An.S.I. ia ka jingpynlong kum kane ka program na ka bynta ka jingmyntoi jong ki paidbah ka jylla Meghalaya khamtam ha kaban ioh ki jingtip kiba tikna halor ka rukom im (culture) bad dur (identiy) jong ki jaidbynriew kyrpang ha kane ka pyrthei bad ha kaba la buh ia ka thong ban kyntiew ban iada ia ka hok longbriew. U la wer ia ki nongshong shnong ban ia snoh kti lang na ka bynta kabit ka biang jong ki paidbah. U la ong ha katei ka jingialang ba ki Dorbar Shnong, Dorbar Kur, Dorbar Raid, Dorbar Hima/Elaka kiba long ki jingsynshar tynrai (Indigenous Institutions of Self Government) ba la synshar khadar bishar da ki Syiem, Lyngdoh, Sirdar, Dolloi, Wahadar, bad Nokma, hapoh jylla Meghalaya ki don ha ka jingialeh mynta la bun bun snem ban iada ia ka jingsynshar sian hima kaba khlem party na ka jingsynshar sain pyrthei da ki political party hapoh ka Sixth Schedule kiba pyntlot kiba pynbakla ia ki Riti ki Dustur tang ban myntoi ki party jong ki.
U la ong ba ki Dorbar Shnong, Dorbar Kur, Dorbar Raid, Dorbar Hima/Elaka kiba long ki jingsynshar tynrai (Indigenous Institutions of Self Government) ba la synshar khadar bishar da ki Syiem, Lyngdoh, Sirdar, Dolloi, Wahadar, bad Nokma, hapoh jylla Meghalaya ki long kiba khlem liang (Party Less) bad ki Rangbah Shnong, Sordar, Myntri, Lyngdoh, Basan, Lyngskor, Sirdar, Syiem, Dolloi, Wahadar, bad Nokma, ki shah jied ha ka nongrim ‘uba ioh ia ka mon uba bun balang’ kaba mut u dei ban ioh la kumno kumno 90 na ka 100 ka jingkyrshan ‘consensus and referendum’, bad ia kano kano ka rai ba mih na kitei ki Dorbar la shim katkum ka mon ‘u ba bun balang’ (consensus and referendum), katba ka jingsynshar kaba mih na ka Constitution Ri India kaba long da ki party – parliamentary system, ki kylla jied nongjop ia ka uba tam da kaba ki ong u ba ioh bun tam ka jingkyrshan ‘majority’, bad kane ka rukom synshar kaba mih na ka Sixth Schedule ka long pyrshah bad ki ia tyngkhuh na ka por sha ka por bad ki jingsynshar Dorbar Shnong, Dorbar Raid bad Dorbar Hima, kumta ka long kaba donkam ia ki bor Sorkar Jylla bad Sorkar India ban shim khia ban thaw lad ban plie lynti ia ki Hima/Elaka ba kin ioh ia la ka jong ka Council hapoh ka Constitution Ri India khnang ba kine ki Culture kin neh kin sah.
U Bah John F Kharshiing, u la ai ia ka copy jong ki sla kiba la sot na ka kot White Paper on Indian States, kaba la buh da u Sardar Valabbhai Patel, Dy Prime Minister, i/c Ministry of States (kaba la tip kum ka Ministry of Home Affairs hadien u snem 1950) hapoh Parliament ha u snem 1949- 1950, ha kaba la don bad paw ki dulir ki jingiateh bad ki jingkular (Instrument of Accession bad Annexed Agreement) jong ki Hima kynthup lang kum ka Federation of Khasi States, ba la soi bad mynjur da ka Government of India ha ka 17 tarik August 1948
Ban rakhe bad pyndonburom ia kane ka sngi, International Day of the Worlds Indigenous People, Ka tnad Anthropological Survey of India ki la pynlong ia ka Health Awareness Camp, na ka bynta ki paidbah ka shnong Tyniar village. Ha katei ka sngi la pynlong ruh ia ka Art competition na ka bynta ki khynnah khylung, ka cultural program na ka bynta ki nongshnong Shnong, bad la air uh ia ki prize ia ki nongia draw. Kiba la ia don bad kiba la ai jingkren ki long ka Dr(Smt) RR Gowloog, Head Office, Anthropological Survey of India, Ministry of Culture, North East Regional Center Shillong, Bah John F Kharshiing, Co-Chairman, Meghalaya State Planning Board & Chairman, The Grand Council of Chiefs of Meghalaya, Spokesperson, Federation of Khasi States, Dr(Smt) Sudipta Ghosh, Anthropological Department NEHU, Dr(Smt) D. Sun, Dr Gautam Kumar Bera, Bah Lom Khongngain, Rangbah Shnong, Tyniar Village, Bah Kan Dohling, Secretary Tyniar Village, Bah Phier Diengdoh, Secretary, Raid Diengsaw, kynthup ki Scientist bad Officials jong ka tnad Anthropological Survey of India, ki riew rangbah, ki longkmie, bad ki khynnah rit jong ka Shnong Tyniar.(sp News)
