Tura, Nohprah 03: Ia ka sngi burom kaba kyrpang na ka bynta kito kiba don ka jingduna ha ki dkhot met mynta ka sngi la rakhe ha Tura da ka jingiatreilang hapdeng ka Bethany Society bad ka tnad Social Welfare jong ka sorkar Meghalaya.
U nongpyniaid ia ka Bethany Society u colonel T Donal. Ha ka jingkren ka jong u la ong ba dei ban burom ia ki khlem da don kano kano ka jingsngew namar ki ruh
ki don ia ka kamram kaba khraw kaba ki leh na ka bynta ka imlang ka sah lang, ia kane ka jingeh jong ki kaba ki ia kynduh haka jingim kum ki briew dei ban ai ka jingiada.
Ha ka jingkren jong u Donal u la ong ba na ka liang jong ka Society kala dep ai 808 tylli ki certificate naka bynta ba kine kiba don ia ka jingduna ha ka dkhot met ka jong ki kin ioh ia ka jingiarap na ka Chief Minister Scheme.
Ha ka jingkren jong ka Neveula M Sangma kawei na ki nonghikai kaba la ioh burom kum ka nonghikai kaba tbit tam, ka la kyntu ia ki kmie ki kpa ba ki dei ban pyntip sha ki bor ba dei piet ban ioh ia ka jingsumar na ka bynta ki khun ki kti jong ki. Ka la ong ba ym dei ban lehrain ban ialam ia ki sha ki jaka jingsumar bakin ioh ia ka jingkoit jing khiah lada sumar ia ki ha ka por kaba biang.
Ha kane ka sngi la don ruh shibun ki jingialehkai ia kiba la pynlong kyrpang na ka bynta jong ki bad la sam ruh ia ki khusnam sha ki nongia shimbynta ha kane ka sngi.(SP News)
