Shillong, Naiweing 16: La rakhe iaka lyngkhuh snem thymmai jong ki paidbynriew Khasi ka la long ha shlem treikam jong ka Riti Academy, JaiawLangsning, Shillong ha ka shiteng synñia jong ka 15tarik Naiwieng, 2020.
Ia kane ka rakhe la pynphuh pynphieng da ki kynrem lyndan ba kynthup ia u Bah Spiton Kharakor, Bah Herman Nongrum bad Bah N Munish Singh.La sdang ia ka rakhe da ka riti ban kynthah spor їa ki dongmusa da ki rangbah ba la maitphang da u Bah Raphael Warjri, Khliehduh ka Synjuk Riti Academy.
Їa ka kheiñ sngi kheiñ їa katkum u bnai bneng la tih bniah da u Bah Spiton Kharakor katkum ka rukom jong ki nongrep. Ha ka jingkren ha ka sngi rakhe u Bah Spiton u la ong, ‘Ki paidbynriew Khasi ki don la ka sngi ba sdang snem kumba long lem kiwei kiwei ki jaitbynriew bad ban rakhe kyrpang ka long ka ba donkam ban tip pateng ki longdien’.
Ha ba la bynñiaw їa la ka Bri Hynñiewtrep u la kynthoh ‘Da ki spah ki hajar mer sawdong ka khyndew la shu duh ei ha kylleng ki jaka khappud, namar ba ym tip la u pud u sam ha la bri la bsah’. Kumta u la kyntu ba ki longdien ki dei ban tip la ka thymmei riti dustur ban neh ka snap tynrai Khasi.
Ha ka lyngkhuh sngi їap jong u Bah B Nishan Wahlang, la kynmaw tympang u Bah Herman ‘Nga la kyrpad їa I Bah Nishan ban batai ne thoh shaphang ka mat tipbriew tipblei ki Khasi, ha ka ba I la buh kyndon bangan їathuh їa ka sngi sdang jong u snem ha ki Khasi’, bad dei kata ka ba la kyntu їa u Bah Spiton ban thwet bniah haduh ba la pynlong kajingrakhe ha ryngkat ka ksing ka dhah mynshymsnem.
La pynmih ruh їa ka almanak Khasi ka ba don ki sngi iew ha kylleng ki thaiñ jong ka Bri Hynñiewtrep.Kawei na ki kyntu kynpham ba la kren mardor da u Bah Herman Nongrum ‘Ai ba ha une u snem thymmai ka khlam ka ngoh ba la lynsher ha kylleng ka pyrthei kan їapduh noh ban koit bankhiah ki bynriew ha satlak pyrthei’,.
kane ka kyntien ka la long ka khubor ha baroh ki kher ki mer ba la don lang ha ka sngi rakhe ban puson bad kyrmen ba baroh ki paidbynriew ki long ki ba shngaiñ ha ryngkat ka koit ka khiah krat.
Kiwei kiwei ki ba la kren ha kane ka sngi rakhe lyngkhuh snem thymmai ki long u Bah N Munish Singh bad bah Raphael Warjri, ha ka ba la shim bynta lang kiwei kiwei ruh ki ba la doh ha kata ka sngi rakhe ba tlem.
