Shillong, Rymphang 05: Ka Dorbar Kur Kharmuti Bakhyndai ka la long mynta ka sngi 5tarik Rymphang 2025, ha shnong Tynring ha ka ba da ki hajar ngut ki parakur parajait jong ka Shilyngwiar Kur Kharmuti ki la ia poi ban shim bynta.
Ki kynrem lyndan ba la wan pynshngaiñ sha kane ka Dorbar Kur Kharmuti ki long u bbah Pyniaidsuk Pyngrope, Lyngdoh Raij Nongkrem, ki rangbahkur na ka Synjuk RangbahKur Ka Bri U Hynñiewtrep ba kynthup ia u khlieh rangbah Bah R L Kharpran bad arngut ki dkhot rangbah, Bah Raphael Warjri bad Bah Will Shylla.
Ha kane ka sngi la don lang u Sohblei Augustine Kharmuti, Sohblei Margareth Kharmuti bad ki rangbahkur nongkitkam ka kur Kharmuti. Ka Dorbar Kur Kharmuti ka dei artat ka lynkhuh arphewsan snem naduh ba la seng ha u snem 2000, ba la rakhe da ka ba pynkiew lama, pyllait ia kotsahkynmaw bad kiwei kiwei ki jingrwai bad jingshad tynrai.
Kumba long lang kiwei kiwei ki kur, u khlieh rangbah, Bah Hosperli Kharmuti u la kyntu ban pynneh pynsah ia ka riti kheiñkur kheiñkha na ka kmie bad u la sneng la kraw ba ki parakur parajait baroh ki dei ban riakor ia la ka longiing longsem bad ka longkur longjait.
Kumban ai bynta lang ia ki longkmie, ka kong Municidora Kharmuti ka la sneng la kraw ia la ki khun ki pyrsa ba kin kiar na ka shongkha khleh khamtam ia la ki khun ki pyrsa kynthei ki ba dei ban ri ia la ka burom jong ka iing bad jong ka kur.
Kiwei kiwei ki ba la kren ki long u Bah Phaiwill Kharmuti, u dkhot nongseng bad saiñpyniar lumlang ba nyngkong duh, u Bah R L Kharpran, Khlieh Rangbah Synjuk ki Rangbah Kur bad u Bah Mollinton Kharmuti, u Taithoh ba la kren lamphrang shaphang ka kotsahkynmaw ba dei shaphang ka khana thymmei kur Kharmuti da ka ba la pyrto ruh ia ki khatsan ngut ki rangbah nongseng ba nyngkong duh.
Ha ka jingkren jong u kongsan, Pyniaidsuk Pyngrope, Lyngdoh Raij Nongkrem, u la iathuh ruh ba ka iawbei ki kur Kharmuti ka dei ka dkhar na Bangla ka ba kyrteng ka Muti ba la wan ialam sha Nongkrem da u longkñi manshwa ka kur Pyngrope, u Lyngdoh Pyngrope.
Uta u rangbah Khasi u la ri la sumar ia kata ka dkhar khunswet haduh ba kan da samla bad la pynpoikha bad u rangbah na War Mawlat u Long Suting, u ba long artat u thawlang jong ka kur Kharmuti.
Na ka Muti bad Long Suting la kha hynriewngut ki khun ba kynthup ia san ngut ki kynthei bad uwei u shynrang ha ka ba la roi la par ka kur Kharmuti haduh mynta mynne.
Kum shibynta ban rakhe ia ka lyngkhuh arphewsan snem la ioh ruh ia ka phawar shaphang ka kur da ki longkmie na ka shnat Pynthorumkhrah bad kiwei kiwei ki jingshad bad jingrwai na kiwei kiwei ki shnat jong ka Shilyngwiar Kur Kharmuti.
