Shillong, Rymphang 18: Ka tnad shna surok jong ka sorkar Meghalaya kala phah trei mynta ban maramot ia ka surok na rum Pynursla ha shilynter ban poi sha Dawki ban pynbha ia kane ka surok kaba la siew palat.
Ki kontraktor ba ioh ban maramot ia kane ka surok kila sdang ban pyndap mawria ia ki thiew bad ha ki jaka jaka kila sdang ban siang rong bad kane kala wan rah ia ka jingkyrmen sha ki paidbah ban kham suk ka leit ka wan ha kane ka surok.
Ha kine ki sngi kiba la lep bun na ki kali kiba leit sha Dawki ynda ki poi sha rum Pynursla kim leit shuh na ka surok Dawki hynrei ki iaid noh na lynti ban leit sha Nohwet bad poi sha Lyngdkhat lyngba ka Pyrdiwah ban poi sha Dawki.
Kane ka jingsniew jong ka surok kala ktah ruh iaki nongleit kai sha Shnong Pdeng, Darang bad Umngot namar ka jingsniew palat ka surok, wat la katei ka thain kala dei kawei na ki jaka bala khring ia ki paidbah na kylleng.
Lah ban pynkynmaw ba ki paidbah na ka thain Pynursla kila leit ban rah pla kard ha khmat ka ophis jong ka NHIDCL kaba don ha Shillong ban pyrshah ia ka jingbym leh ei ei halor kane ka jingsniew katei ka surok.
