Shillong, Rymphang, 24: U Shongknor ka iing dorbar thawain Lok Sabha, u Om Birla un ai jingkren sha ki dkhot jong ka Iing dorbar thawain jong ka jylla Meghalaya ha nongbah Shillong ha ka 25 tarik Rymphang, 2021. Ha ka por ba u wan poi ha phyllaw jong ka iingdorbar thawain, u Birla un pdiang ia ka Guard of Honour. Hadien kane, un leit jngoh ia ka building ba thymmai jong ka iing dorbar thawain jong ka Meghalaya.
Ha ka 26 tarik Rymphang 2021, u Birla un plie ia ka prokram Outreach and Familiarisation na ka bynta ki kynhun shnong jong ka jylla Meghalaya bad na kiwei kiwei ki jylla jong ka thain shatei lammihngi ha nongbah Shillong.
Nalor u Birla, ha kane ka Outreach programme yn iadonlang ruh u Dr. Conrad K. Sangma, Myntri Rangbah jong ka jylla Meghalaya; u Rameshwar Teli,Myntri khynnah jong ka Sorkar Pdeng ba dei khmih ia ka Tnat Food Processing Industries; u Bah Metbah Lyngdoh, Shongknor ka iing dorbar thawain jong ka jylla Meghalaya bad u Bah Lakhmen Rymbui, Myntri ba dei peit ia ka tnat District Council Affairs, Sorkar Meghalaya.
Kin don katto katne ki dkhot jong ka iing dorbar thawain Parliament bad kiwei kiwei ki heh ki hain ki ban iadonlang ha kane ka jingialang. U Birla u la shim ia ka sienjam kaba kyrpang, ka outreach programme, na ka bynta ki Panchayati Raj jong ka ri.
Ia ka prokram Outreach bad Familiarisation na ka bynta ki Panchayati Raj jong ka ri, kaba long ka prokram kaba nyngkong eh kaba kum kane la pynlong da ka Parliamentary Research bad Training Institute for Democracies (PRIDE) Lok Sabha Secretariat da ka jingphaikhmat sha ka jingkyntiew ia ka jingiashim bynta ha ka synshar paidbah lyngba ka jingtip ba kham bniah shaphang ki rukom treikam jong ki kynhun shnong ha ki kyrdan bapher bapher.
Ia ka Outreach Programme kaba nyngkong la pynlong ha Dehraduh ha ka 8 tarik Kyllalyngkot 2021 ha kaba 445 ngut ki dkhot Panchayat kynthup 13 ngut ki Chairman jong ka Zila Panchayat bad 12 ngut ki Deputy Chairman, 125 ngut ki dkhot jong ka Zila Panchayat ryngkat bad 85 ngut ki Block Panchayat Pramukh bad 210 ngut ki Gram Pradhan jong ka Uttarakhand ki la wan iashim bynta markhmat. Nalor kine, la iasoh lang sha kane ka prokram ia kumba 40,000 ngut ki dkhot Panchayat bad ki ophisar lyngba ka ‘online via weblink’
Ka bynta ban wan jong ka Outreach Programme la pynbeit ban pynlong na ka bynta ki kynhun shnong ka Meghalaya bad kiwei kiwei ki jylla jong ka thain shatei lammihngi ha ka 26 tarik Rymphang 2021 ha nongbah Shillong, Meghalaya. Ka phang jong kane ka prokram kalong ‘Panchayati Raj System bad Autonomous District Councils: Strengthening the Decentralised Democracy’.
Kumba 90 ngut ki dkhot jong ki Autonomous District Council jong ka Meghalaya kin iashim bynta markhmat ha kane ka prokram. Nalor kine, 80 ngut ki nongmihkhmat na ki kynhun shnong jong kiwei kiwei ki jylla ka thain shatei lammihngi ba kynthup 15 ngut ki chairman jong ka Zila Parishad na Arunachal Pradesh, 26 ngut ki chairman jong ka Zila Parishad na Assam, 6 ngut ki chairman jong ka Zila Parishad na Manipur, 6 ngut ki MDC na Mizoram.
La jied 5 ngut ki nongmihkhmat jong ki Village Council na Nagaland, 4 ngut ki chairman jong ka Zila Parishad na Sikkim bad 8 ngut ki chairman jong ka Zila Parishad na Tripura kin iadonlang markhmat ha kane ka prokram. Nalor kane, ki dkhot ba sah jong ka panchayat na baroh ki jylla ka thain shatei lammihngi kin iasoh sha kane ka prokram lyngba ka ‘online via weblink’.
Ki jing thmu ba kongsan jong kane ka prokram ki long, Ka jingkyntiew ia ka jingtip bad ka jingiashim bynta; Ka jingkyntiew ia ka jingngeit halada / ka jingsngew sarong jong ki nongmihkhmat ban trei ia la ka kam, Ka jingwanrah ia ka jingsngew trai ia ki jingdon jingem ba la pynbiang.
Ka jingpynshlur ia ki thong jong ki nongmihkhmat na ki jaka nongkyndong ha ka rukom synshar paidbah, Ka jingpyntip shaphang ki skhim bapher bapher bad ki lad na ka bynta ki kam ka roi ka par, Ka lad ban sdang ia ka jingiatreilang bad ban kyntiew ia ki jingthmu jong ki nongialam.
U Bah Prestone Tynsong, Symbud Myntri Rangbah jong ka sorkar Meghalaya; bad u Timothy Shira Symbud Shongknor jong ka iing dorbar thawain jong ka Meghalaya kin iadonlang ha ka sngi kut. Ki dkhot bad ki nongiashim bynta ki la sdang ban wanpoi ha nongbah Shillong mynta ka sngi.
