Shillong, Nailur 13: U Dr Wanway Roy Kharlukhi MP Rajya Sabha ba la shah jied na kane ka jylla Meghalaya yn sa shim smai la shai ka sngi ha ka por lai baje noh phai sngi kum u MP ba pura jong ka iing dorbar ha Rajya Sabha na ka party NPP.
Haba kren ha u SP News Agency u Dr Kharlukhi u la iathuh ba mynta u la don sha Delhi ban ia shim bynta ha ka dorbar lyiur jong ka dorbar bah ka Ri ha Parliament bad la buh ba ka jingpynsmai kum u MP jong ka Rajya Sabha kan long la shai ka sngi por lai baje noh phai sngi.
Kane kan long ka sien kaba nyngkong ia u MP Rajya Sabha jong ka jylla Meghalaya ba un ia shim bynta hapoh ka iing dorbar naduh ba u la shah jied ban mih khmat ia ka jylla Meghalaya sha ka iing dorbar Rajya Sabha.
Kane ka dorbar lyiur jong ka parliament kan sdang la shai ka sngi bad kan don 18 sngi lynter ka jingiashong dorbar bad ha kine ki jingiashong dorbar kin don 11 tylli ki jingpynbna sorkar ban pynlong ain ia ki.
