Shillong, Nailar 13: Haduh mynta ka sngi ka Khasi Hills Autonomous District (Khasi Social Custom of Lineage)(Second Amendment) Bill, 2018 ia kaba la pass da ka iing dorbar jong ka Khasi Hills Autonomous District Council (KHADC) ha ka 24 Naitung 2018 kam pat poi sha KHADC wat la u Lat jong ka jylla u la dep ban phah biang sha ka sorkar.
Katkum ki thymmei khubor kiba u SP News Agency, u la ioh jingtip, la ong ba ka Executive Committee jong u Bah HS Shylla hapoh jong ka KHADC kan ia shong pyrkhat la shai ka sngi ban ia kren halor katei ka Bill kaba la dep ban pass da ka iing dorbar, la kin pan biangnoh ia ka Bill na ka sorkar ban pynbeit biang ia ka ne kin ieh ha ka jingstad jong ka sorkar.
Katkum ka rule jong ka Assam and Meghalaya Autonomous District (Constitution of District Councils Rules, 1951, katkum ka kyndon 93 ka long ba lada u Lat jong ka jylla u phah biang ia ka Bills sha ka District Council, katkum ka kyndon 92 (III) ka long ba u Lat ka jylla haba u phah u hap ban kdew ruh ia ki daw.
Ki thymmei khubor ki iathuh ba ka KHADC, kan pan biang na ka sorkar ia kane ka Bill na ka bynta ban pynbit pynbiang ia ki katto katne ki jingduna ha kane ka Khasi Hills Autonomous District (Khasi Social Custom of Lineage)(Second Amendment) Bill, 2018, kan nym ap ba u Lat jong ka jylla un pynphai biang ia kane ka Bills sha KHADC.
