Shillong, Rymphang 04: Mynta ka sngi kiba la thep kyrteng ban ia khun ia ka ilekshon shongknor hapoh ka iing dorbar jong ka KHADC dei tang u bah Lamphrang Blah na ka party NPP bala pynieng da ka kynhun UDA hapoh jong ka KHADC.
Ha kane ka jingleit thep kyrteng la synran lang ia u bah Blah da u bah Pyniaid Sing Syiem, bah Mitchell Wankhar, bah Bajop Pyngrope MDC ka seng Congress bad kiwei ki para MDC na ka kynhun UDA.
Ha dien bala bishar ia ki kot ki slab a thep kyrteng la shem ba kila long kiba biang, hynrei namar ba ym don ban ia khun pyrshah u bah Blah u la jop ia kane ka ilekshon shongknor ha KHADC bad ha ka sngi nyngkong yn sa pynbna hapoh iing dorbar ia ka jingjop u bah Blah.
Ban shu pynkynmaw ba na ka liang pyrshah kam shym la pynieng kyrtong ban burom ia u bah Lamphrang Blah u MDC bala rim tam hapoh jong ka KHADC ba un poi sha katei ka kyrdan hapoh ka iing dorbar thawain jong ka KHADC.
