Shillong, Naitung 28: U lat jong ka jylla katkum ka jingbthah jong ka Meghalaya High Court la thaw ia ka Kommittee kaba kyrpang ban ai jingmut sha ka sorkar ha kaba ia dei bad ka jingpynkhuid ia ki um ki wah ha ka jylla.
U Chief Conservator jong ka shant ba dei peit ia ki mrad khlaw u P R Marak ba dei Secretary jong kane ka Kommittee la ong ba kila dep ban ia shong jingialang shisien bad ha kane ka jingialang ka long ba kila ia mynjur ban peit ia ki um kiwah kiba kumno ba don kam peit shuwa.
Haba kren ha ki lat pathai khubor mynta ka sngi la ong ba ki don shibun ki kynhun kiba peit ia ka jingpynkhuid ia ki um ki wah, hynrei kane ka long ban lum lang ia baroh ki kynhun ha kawei ka shatri ban ia peit lang ia kane ka jingeh.
La iathuh ba kane ka kynhun ka don ruh ia ka bor ban kyntup biang ia ki dkhot ban ia don bynta ha kane ka committee bad ka bynta jong kane ka committee ka long ban ai jingmut sha ka sorkar kumno ban iada ia ki um ki wah ha ka jylla.
La iathuh na ka jingjurip jong ka National Green Tribunal kala shem ba ha Meghalaya ki don hynniew tylli ki wah kiba jaboh bad kita ki long ka wah Umkhrah, Umsherpi, Kyrhohkhla, Nanbah, Umtrew, Lukha bad ka Myntdu.
Haba ia dei bad ka jingjaboh jong kine ki wah na ka liang jong ka tnad khlaw kala pynkhreh kumno ban iada bad ban pynkhuid ia kine ki wah, la kyntu ia ki paidbah ba kin ai jingmut kumno ban pynkhuid ia ki um ki wah ha ka jylla, la ong bynrap ka Anu P James DFO ka tnad khlad.
