Shillong, Rymphang 27: Ka jingialang jong ka kynhun Meghalaya Democratic Alliance (MDA) kala long mynta ka sngi ban ia kren halor ka kam ilekshon MP sha Rajya Sabha ka ban long ha ka 26 tarik jong u bnai Lber.
U myntri rangbah ka jylla u Conrak K Sangma u ba dei u lamphang jong ka kynhun MDA haba kren ha ki lat pathai khubor ha dien ka jingialang, u la ong ba ha kane ka jingiakynduh kum ka MDA kila ia kren halor ka ilekshon MP sha Rajya Sabha bad ki kwah ba kum ka kynhun dei ban don tang u wei u kyrtong.
La iathuh ba kila ia kren namar kila don kato katne ki kyrteng ia kaba yn nym lah ban iathuh ia ka kyrteng jong ki, kala don ka jingiakren bniah bad la shim ruh ia ka jingsngew jong baroh ki kynhun kiba don ha ka UDA bad kila shim ia ka rai ba kin ia long tylli kawei.
Haba ia dei bad kane la thaw ia kawei ka sub- committee kaban khlieh da u symbut myntri rangbah u bah Prestone Tynsong ban ia kren ia kane ka kam MP sha Rajya Sabha.
Kumba kila leh ha ka ilekshon speaker bad ki dkhot jong kane ka committee ki kynthup ia u president ka UPD, u nongialam ka PDF, NCP, Indipendent,BJP bad ka HSPDP ki ban long ki dkhot bad kane ka committee kan ia kynduh la sngi nyngkong.
La iathuh ba ki party kin don ka jingiakynduh ha pdeng jong ki ha kine ki sngi shuwa ba kan poi katei ka sngi bad kane ka sub-committee kan shong ha ka sngi nyngkong bad ha katei ka sngi yn lah ban shim ia ka rai jong u kyrtong MP sha Rajya Sabha.
Ha kane ka jingiakynduh mynta ka sngi la ia kren ruh halor ka dorbar mang tyngka ka ban sa long shen.
