Shillong, Naitung 7: Ha ka sien kaba nyngkong eh ha ka history jong ka thaiñ Wapung, kawei 
na ki thaiñ ha Jaintia Hills kaba bun bha ki jaid Kur Dkhar la plie bad thung pynskhem ia ka tnad trei kam jong Ka Seiñ Kur Dkhar Jaintia Hills ha kane ka sngi Saitjaiñ, 06 tarik u July, 2019, por 11:00Am ha Community Hall, jong ka shnong Wapungshnong.
Ka Seiñ Kur Dkhar Central Body hapoh ka jingialam u K.B Dkhar, President bad u Hamjhan Dkhar General Secretary jong ka, ha ryngkat bad ka jingiadon lang ki nongialam jong ka Seiñ Kur Dkhar Jaintia Hills, East Zone, u Libas Dkhar, President bad u Pdianghun Dkhar General Secretay, ki la hiar ha kane ka sngi Saitjaiñ ba la dep sha ka thaiñ Wapung bad thung bad pynskhem syndon ia ka tnad trei kam jong ka Seiñ Kur Dkhar Jaintia Hills ia kaba la ai kyrteng da ka “Seiñ Kur Dkhar Jaintia Hills, Wapung Circle”.
Ha ryngkat ka jingialang kaba ishongkun bha, la pyntian smai ia ki nongkit kam jong Seiñ Kur Dkhar Jaintia Hills, Wapung Circle da u President jong Seiñ Kur Dkhar Jaintia Hills Central Body, u K.B Dkhar, katba ia ki dkhot jong ka Executive Committee pat la pyntian smai da u General Secretary jong ka Seiñ Kur Dkhar, u Hamjhan Dkhar.
Ki shnong kiba la bynta ki ban hap hapoh ka jingkdup jong ka Seiñ Kur Dkhar Jaintia Hills, Wapung Circle, ki long, Wapungskur, Wapungshnong, Pamrakmai, Pamra Paithlu, Mookhep, Jalyiah, Khliehmyntriang, Iongkaluh, Iurim Khliehshnong, Sohkymphor, Byrwai bad Rashai lah ruh ban kynthup sa ia ka Tuberkmai Shnong bad Shohshrieh lada donkam.
Ha katei ka jingialang pynskhem paidbah ia katei ka tnad trei kam jong katei Seiñ Kur Dkhar Jaintia Hills, la wan sakhi da ki spah ngut ki ki paidbah kiba dei na ka Kur Dkhar kiba don ha katei ka Circle. La pynphuh pynphieng shuh shuh ia katei ka sngi, da ki rwai ieit kur bad jingshad tynrai da ki khun samla jong ka Kur Dkhar kiba hap hapoh jong katei ka Circle hi.
Ha katei ka jingthung pynskhem ia ka tei ka tnad trei kam jong ka Kur Dkhar Jaintia Hills, la ioh ia ki jingkren kyntu kynpham na ki nongialam bap her bap her jong ka Seiñ Kur Dkhar Jaintia Hills ki ba kynthup naduh Central Body bad East Zone, kata u K.B Dkhar bad Hamjhan Dkhar, Pdianghun Dkhar, bad kiwei kiwei ha lor ka phang, kumno ban trei shitom ban tehsong ia ka jingia ithuh ithaw, jingiaieit iajan, jingiarap ba mar kylliang shikur shijait bad ruh kumno ban tehsong ia ka jinglong kawei ka doh kawei ka snam jong ka Kur Dkhar khnang ban lait na kino kino ki jingiashong kha sang para Kur Dkhar haiden ha bud bad ruh halor kiwei kiwei de ki phang na ka bynta ka bha ka miat jong ka Kur Dkhar bad wat ka Jaidbynriew hi.
Ki Nongkit Kam ba nynkong jong ka “Seiñ Kur Dkhar Jaintia Hills, Wapung Circle”. Ki long, President, Shaniahskhem Dkhar; Vice President, U Chawas Dkhar bad u Market Dkhar; General Secretary, Kyrshanbha Dkhar; Assistt. General Secretary, u Francis Dkhar bad u Shngainlang Dkhar; Finance Secretary, u Binis Dkhar, Treasurer, ka Rosa Dkhar; Adviser, u M H Dkhar bad u Emmon Dkhar lem bad sa 15 ngut ki dkhot sha ka Executive Committee. Kane ka long kat kum u kyrwoh khubor ba la pyllait da u Bah M.H Dkhar, u Adviser jong ka Seiñ Kur Dkhar Jaintia Hills, Wapung Circle.
