Shillong, Rymphang 03: Mynta ka sngi ka sorkar Meghalaya kala pynmih ia ka jingpynbna sorkar la thung ia u Director General ka tnad pulit ba rim ka jylla u R.Chandranathan ba yn long kum u “Security Adviser” jong ka sorkar Meghalaya.
Ia kane ka jingpynbna mynta ka sngi la soi da u bah D.P Wahlang additional Chief Secretary jong ka sorkar jylla ba dei peit ia ka tnad kam poh iing bad ia ki jingtrei kam bad ia ka jinglut la batai shai ruh ha ka jingpynbna bala pynmih mynta ka sngi.
Ha ka jingpynbna la batai shai ba ka kam kaba un trei kan long ban peit ia ki kam kiba ia dei bad ka tnad kam poh iing ka sorkar pdeng bad kiwei ki tnad syntiat bad ki lat ai jingiada ia ki heh sorkar sha kiwei ki jylla lait noh ha jylla Meghalaya.
Ka ophis trei kam jong u nongaibuid ia ka sorkor ha ki lat ai jingiada kan don ha ha APJ Abdul Kalam Road New Delhi, kane ka jingthung kum u Security Adviser kan long na ka bynta shisnem lah ban pynjlan lada don kam.
Ka jingsiew ia u Security Adviser kan long T.75,000/- tyngka ha ka shibnai, kan don ruh ka jingsiew ia ka TA bad DA katkum ki kyndon bala buh da ka sorkar, ka sorkar kan ai ka kali bad ka bai umphniang katkum ki kyndon sorkar.
Kiwei pat ki jingsiew yn siew katkum ki kyndon kiba la don lypa bad ka jingsiew kan long na ka tnad pulit ka “ Head 2055-Police-001-Direction bad Administration-(01)-IGP’s Office-01-Salaries-General-Voted”
