Shillong, Jymmang 05: Ha dien ba la mih ka jingiaklumar ha Manipur ka sorkar Meghalaya kala shim ia baroh ki lat ki lynti ban wanialam noh ia ki samla pule kiba don ha katei ka jylla bad mynta ka sngi la ioh ban wan ia lam ia ka kynhun kaba nyngkong da ka liengsuin 66 ngut sha Guwahati.
Katkum ka jingkhein kaba la shim da ka sorkar ki samla pule ka jylla kiba pule ha ki jaka bapher bapher ka jylla Manipur ki don 200 ngut bad mynta ka jan meit la ioh ban wan lam 66 ngut bad ia kiba dang sah ruh ka sorkar kan ialeh ban wan ialam noh ia kiba dang sah ha katei ka jylla.
Ia kine ki 66 ngut ki samla pule la pdiang burom da ki briew jong ka sorkar ha kad liengsuin Guwahati, na ka liang jong ka ki dkhot ka KSU ruh kila ia don lang ha katei ka jaka ban pdiang burom ia ki ha kaba ka sorkar kala pynkhreh ia ki kali ban wan ialam sha Shillong, la ai ruh ia ka bam sha ki samla pule ha liengsuin Guwahati.
Na ka liang jong ka KSU ruh kala phah ia ki dkhot ka seng hapoh ka jingalam jong u samla Vincent Makri bd kiwei ki dkhot ka seng kane ka long leit ka long ban pdiang burom ia ki bad ban wan ialam ia ki sha Shillong.
