Shillong, Nailar 07: Ka Khasi Hills Autonomous District Council mynta ka kynduh mawsiang ha kaba ia dei bad ka Nongwah Mawtamur shano ban pynhap, la kan long ha hapoh ka hima Sohiong ne hapoh jong ka hima Jirang, haduh mynta ka District Council kam pat weng ia ka jingpynbna paidbah bala pynhap hapoh ka hima Jirang.
Ka Nongwah Mawtamur ka dei kawei na ki jaka ba don hapdeng ka jingiakam mar kylliang hapdeng ka jylla Meghalaya bad ka jylla Assam bad mynta ka dei kawei na ki mat ia kren ha kane ka jingiapynbeit pud hapdeng ka Assam bad Meghalaya.
Katkum ki jingtip kiba la ioh ki 14 tylli ki shnong kiba hap hapoh jong ka Nongwah kila dep ban ai da ka jingthoh sha KHADC ha u snem 2021 ban pynsngew bala da pynhap ia ki sha hima Sohiong kin leit noh sha Assam bad lada pynhap hapoh ka hima Jirang kin iai shah hapoh ka jylla Meghalaya, ia kane ka jingthoh kila ai kotpi ruh sha u Syiem ka hima Jirang.
Ka jingpynhap ia ka hima Mawtamur ha u snem 2015 da ka KHADC ka long katkum ka jingkwah jong ki 14 tylli ki shnong, na ka liang jong ka KHADC ruh ha u ne u juh u snem kala pynmih ia ka jingpybna ba kitei ki ki shnong ha Nongwah Mawtamur kin hap hapoh ka hima Jirang.
Hynrei ha dien kata kala don ka jingpyrshang ban dawa na ka KHADC ban pynphai biang ia katei ka Nongwah Mawtamur sha ka hima Sohiong, kane kala pynlong ia kitei ki 14 shnong ban phah ia katei ka jingthoh sha ka KHADC ban ong ba lada pynhap hapoh ka hima Sohiong kin leit sha Assam.
Baroh kine ki phew snem ka Assam kala buh ia ka ktem pulit jong ki ha ka wah Umthna bad kane ka dang don haduh mynta, hynre ha u snem 2022 ka sorkar Assam kala shnada ka suron na Rani Amring, sha Umsahlani, sha Dumakaham, sha Umor, sha mewalum bad poi sha Gharbagnar.
