Shillong, Rymphang 07: Ki nongialam jong ka KSU War Jiantia mynta ka sngi kila leit ban ia kynduh ia u DIG jong ka Eastern Range u bah MK Dkhar ban ia kren halor ka jingwan rung ki khar Bangladesh sha ki thain Dawki.
U Bah Laitphar Syngkrem president ka KSU War Jiantia Circle haba kren ha ki lat pathai khubor u la iathuh ba ha kane ka jingiakynduh bad u tei u heh pulit kila dawa na u ba dei ban phah shuh ia ki pulit SF-10 ban don ha katei ka thain.
La ong ba kumba ka long ha ka 5 tarik mynta u bnai u Sunam Bishnab ba bylla ha West Jiantia Hills Distict u la wan ialam san ngut ki khar Bangladesh bad ki iaid na khamat jong ki BSF hynrei ki khlem kem ia ki.
Na ka liang jong ki paidbah ka War Jaintia kila duh ia ka jingshaniah ha ki BSF namar kane ka jingleh jong ki. U tei u nongialam ka KSU u la ong ba lada ka sorkar kam leh ei ei ka KSU bad ki shnong ka thain Dawki kin iada hi na ki khar Bangladesh.
La iathuh ba ha ka jingiakren bad i DIG jong ka Eastern Range, u bah MK Dkhar u la ai ka jingkular ba un sa ia kren bad ki BSF ban phah shuh ia ki kynhun pahara ha khappud bad ha ka juh ka por un sa ia kren bad u myntri rangbah ka jylla halor kane ka jingjia ha khappud bad ka Bangladesh.
