Shillong, Risaw 23: U Dr Mukul Sangma nongialam ka liang pyrshah mynta ka sngi u la ong ba lada don ba lah ban dang pynshisha ba u dewiong u dang don 32 lakh MT ha ki Depo kumba la kam da ka sorkar yn iehnoh na ka kam politic.
Haba kren ha ki lat ptahai khubor mynta ka sngi ha MLA Hostel u la ong ba ha kine ki sngi kiba dang wan un sa leit ban jurip ia ki Depo ba buh dewiong bad u khot u wer ia ki riew paidbah bad ki seng trei man sngewbha ba kin ia don lang lada ki kwah ban iada ia ka jylla Meghalaya “Save Meghalaya”.
La ong ba katkum ka jingkhein kaba ka sorkar Meghalaya kala dep ban ai sha ka NGT ka long ba u dewiong u dang don 32 lakh MT ha ki jaka bapher bapher jong ka jylla, kum ka East Jaintia Hills, West Khasi Hills, South West Khasi Hills bad South Garo hills.
U Dr Mukul u la ong ba lada u ta u dewiong u dang don 32 lakh MT ka sorkar ka dei ban dei lilam ia u , hynrei kaei kaba ka sorkar kaleh ia ka rukom pyniaid ha kata ka rukom ba khlem da siew ia ka khajna jong u dewiong sha ka jylla.
U Dr Mukul u la ong ba ka jingleit jurip ka jong u ha Negra ha East Garo Hills la shem ba katkum ka jinglilam ka sorkar ia u dewiong ka long haduh 34,000 MT hynrei kaei kaba la shem ba u dewiong ba don ha Depo Negra u don tang hapdeng 4000 MT haduh 5000 MT.
Katkum ka rai jong ka NGT kaba la pynmih ha ka 3th Naitung 2019 la ai bor ia u Chief Secretary bad ia u Director Genenral ki Pulit ba kin peit ia ka rukom pynkit ha kaba kit ia u dewiong hynrei kane kam shym la jia kumba la bthah.
Katkum ki kyndon ban kit ia u dewiong ka long 9 MT, u Dr Mukul u la ong hato don kata ka trok ba kit 9 MT, u nongialam ka liang pyrshah u la maham ia ki ophisar kiba iarap ia ka sorkar bad dei tang u blei ba lah ban iada ia ki ka congress party kan nym shong kli kti halor kane kan ujor ruh sha ka sorkar pdeng.
La kynnoh ba ka sorkar kala pyndon kam ia ki bor jong ka sorkar dei na kane ka daw ba ki ophisar ki lah ban pynlait ia ki shallan, u la Dr Mukul u la ong ba hap ban iada ka jylla na kane ka jingleh kane ka sorkar kaba mynta “Save Meghalaya”.
